თბილისი, 18 ოქტომბერი — Sputnik. ლარის კურსი დასტაბილურდება და საშუალოვადიან პერიოდში გამყარების ტენდენციას შეინარჩუნებს. განუცხადა ფინანსთა მინისტრმა ნოდარ ხადურმა ჟურნალისტებს სამშაბათს.
ბოლო 20 დღის განმავლობაში ლარის კურსმა დაცემა დაიწყო და 26 სექტემბრიდან 2,7%-ით დაეცა. საქართველოს ეროვნულმა ბანკმა ლარის გაცვლითი კურსი დოლარის მიმართ 19 ოქტომბრიდან 2,3586₾/1$ ნიშნულზე დაადგინა. წინა ნიშნულთან შედარებით, ლარის კურსი დოლარის მიმართ 0,069 ლარით გაიზარდა. ხადურის თქმით, საქართველოს ეროვნულმა ბანკმაც გააკეთა განცხადება, რომ კურსის ცვლილება ერთჯერადი ტრანზაქციებით იყო გამოწვეული.
„როგორც ჩვენი მხრიდან, ისე ეროვნული ბანკისა და საერთაშორისო ფინანსური ინსტიტუტების მხრიდან არაერთხელ გაკეთდა განცხადება, რომ კურსი დასტაბილურდება და საშუალოვადიან პერიოდში გამყარების ტენდენციას შეინარჩუნებს“, — თქვა ხადურმა.
