თბილისი, 4 ოქტომბერი — Sputnik. საქართველოს განათლებისა და მეცნიერების სამინისტროს ეზოში „ცარცით ხატვის ფესტივალი“ გაიმართა, რომლის ფარგლებში მიუსაფარმა ბავშვებმა უწყების ტერიტორიაზე ასფალტი ცარცით მოხატეს.
ფესტივალს საფუძვლად დაედო კვლევა, რომელშიც მიუსაფარმა ბავშვებმა საკუთარი დამოკიდებულება გამოხატეს სწავლის, არაფორმალური განათლების, საგანმანათლებლო და შემეცნებითი ღონისძიებების მიმართ. განათლების მინისტრმა ალექსანდრე ჯეჯელავამ მონაწილეებს არა მარტო სიმბოლური საჩუქრები გადასცა, არამედ მათთან ერთად ასფალტის მოხატვაშიც მიიღო მონაწილეობა.
„დღეს გვქონდა ძალიან სახალისო ღონისძიება. სამინისტროს ეზოში ცარცით ჩვენი პატარა საყვარელი ბავშვები ხატავდნენ, რომლებიც მონაწილეობენ ძალიან საინტერესო პროექტში, რაც გულისხმობს იმ ბავშვების ინტეგრაციას სასწავლო პროცესსა და საგანმანათლებლო სისტემაში, რომლებიც დღის ცენტრებისა და მიუსაფარი ბავშვების ცენტრების მომსახურებით“, — განაცხადა ალექსანდრე ჯეჯელავამ.
ესენი ნიჭიერი, არაჩვეულებრივი ბავშვები არიან, რომელთაც ბედმა ცხოვრების რთული დასაწყისი არგუნა. თუმცა, ჩვენ ვიცით, რომ მათგან ყველაზე დიდი პატრიოტები და პროფესიონალები გამოდიან, აღნიშნა მინისტრმა.
,,ცარცით ხატვის ფესტივალში” მონაწილეობდნენ სოციალური მომსახურების სააგენტოს თბილისის, ქუთაისისა და რუსთავის დღის ცენტრებში მყოფი მიუსაფარი ბავშვები. ცენტრებში ბავშვებს შეუძლიათ დაბანა, სამედიცინო და ფსიქოლოგიური დახმარების მიღება.
2016 წლის ივნისის მონაცემებით, თბილისის დღის ცენტრში 70-ზე მეტი ბავშვი დადის, რუსთავის ცენტრში — 16, ქუთაისის — 27. გარდა ამისა, თბილისის თავშესაფარში დადის 26 ბავშვი, რუსთავის — 11. აქედან 53% ქართველია, 25% — ბოშა, 17% — აზერბაიჯანელი. დანარჩენი 5% — სხვადასხვა ეროვნების.
