თბილისი, 30 ივნისი – Sputnik. საქართველოს ფინანსთა სამინისტროს საგამოძიებო სამსახურის თანამშრომლებმა თაღლითობის ფაქტზე, თბილისის მუნიციპალიტეტის საკრებულოს, მიწის საკუთრების უფლების აღიარების კომისიის, მომსახურების განყოფილების ყოფილი თანამშრომელი, დავით გასოევი დააკავეს.
გამოძიების მონაცემებით, ბრალდებული, თბილისის ერთ-ერთ მოქალაქეს მოტყუებით დაპირდა, რომ ქალაქ თბილისში, მიწის ნაკვეთის საკუთრების უფლების მოპოვებაში დაეხმარებოდა. ამაში მას საკრებულოში ძველი ნაცნობები დაეხმარებოდნენ.
სანაცვლოდ კი გასოევმა 4 000 აშშ დოლარი მოითხოვა, აცხადებენ საგამოძიებო სამსახურის პრეს-სამსახურში. სამართალდამცავებმა ის მოთხოვნილი თანხის ნახევრის აღების ფაქტზე დააკავა.
საქმეზე მიმდინარეობს გამოძიება საქართველოს სისხლის სამართლის კოდექსის მუხლით „თაღლითობა“, რაც სასჯელის სახით ითვალისწინებს 2 დან 4 წლამდე თავისუფლების აღკვეთას.
დავით გასოევი თბილისის საკრებულოში 2013 წლიდან 2015 წლამდე პერიოდში მუშაობდა.
