თბილისი. 23 ივნისი — Sputnik. ხუთშაბათს საქართველოსა და ევროკავშირს შორის ხელი მოეწერა შეთანხმებას „საიდუმლო ინფორმაციის ურთიერთგაცვლისა და დაცვისთვის საჭირო უსაფრთხოების პროცედურების შესახებ“.
დოკუმენტს ხელი მოაწერა საქართველოს საგარეო საქმეთა მინისტრმა მიხეილ ჯანელიძემ და ევროკავშირის დიპლომატიის უმაღლესმა წარმომადგენელმა ფედერიკა მოგერინიმ.
შეთანხმების გაფორმება ემსახურება ევროკავშირის ქვეყნების ინფორმაციის უსაფრთხოების სტანდარტებთან საქართველოს დაახლოებას და, როგორც უწყება განმარტავს, შეთანხმება აუცილებელი ელემენტია ევროკავშირის სამშვიდობო მისიებში საქართველოს მონაწილეობის ეფექტიანობის გაზრდის კუთხით.
„2016 წლის 23 ივნისს საქართველოსა და ევროკავშირს შორის ხელი მოეწერა შეთანხმებას „საიდუმლო ინფორმაციის ურთიერთგაცვლისა და დაცვისთვის საჭირო უსაფრთხოების პროცედურების შესახებ,“- ნათქვამია საქართველოს საგარეო საქმეთა სამინისტროს განცხადებაში.
მოგერინიმ ხაზი გაუსვა, რომ ორშაბათს ჩატარებული შინაგან საქმეთა მინისტრების საბჭოს სხდომაზე ევროკავშირის 28 წევრ-ქვეყნის სახელით მან მკაფიოდ დააფიქსირა აზრი საქართველოსათვის ევროკავშირთან უვიზო რეჟიმის მინიჭების თაობაზე. მოგერინის თქმით, საქართველომ ყველა პირობა შეასრულა და ევროკომისიის რეკომენდაცია გულისხმობს ქვეყნისათვის სავიზო რეჟიმის ლიბერალიზაციის მინიჭებას.
