თბილისი, 7 აპრილი — Sputnik. საქართველოში პროექტ „ინტერნეტი ყველა სოფლის ბიბლიოთეკას“ მეორე ეტაპი დაიწყო, რომელიც პრეზიდენტ გიორგი მარგველაშვილის ინიციატივით ხორციელდება, იუწყება სახელმწიფოს მეთაურის ადმინისტრაციის პრეს-სამსახური.
პროექტის მიზანია ქვეყნის ყველა სოფლის ბიბლიოთეკის ინტერნეტითა და კომპიუტერული ტექნიკით აღჭურვა. პროექტის მეორე ეტაპის პრეზენტაცია ოთხშაბათს პრეზიდენტის ადმინისტრაციის ხელმძღვანელმა გიორგი აბაშიშვილმა გამართა.
„მინდა მადლობა გადავუხადო საქართველოს საბიბლიოთეკო ასოციაციას. სწორედ მათთან თანამშრომლობით ჩვენ შევძელით შარშან 50-მდე ბიბლიოთეკის აღჭურვა შესაბამისი ტექნიკით, ინვენტარითა და ინტერნეტით“, — თქვა აბაშიშვილმა პრეზენტაციაზე, რომელიც პრეზიდენტის რეზიდენციაში ჩატარდა.
პროექტის მეორე ეტაპზე იგეგმება ბიბლიოთეკარების გადამზადება, რისთვისაც შესაბამისი ტრენინგები ჩატარდება.
