თბილისი, 16 მარტი – Sputnik. საფრანგეთის ჩრდილო-დასავლეთით, ბრეტანის რეგიონში კორონავირუსის ახალი ვარიანტი დაფიქსირდა – ექსპერტების წინასწარი მონაცემებით, მისი მომატებული საშიშროების დამადასტურებელი ფაქტები არ არსებობს, იუწყება ქვეყნის ჯანდაცვის სამინისტრო.
ახალი ვარიანტის აღმოჩენა რთული იყო: ამ ვირუსით დაავადებულებს ჰქონდათ SARS-CoV-2-სთვის დამახასიათებელი სიმპტომები, თუმცა PCR–ტესტი ვირუსის არსებობას არ ავლენდა.
„13 მარტს ლანიონის საავადმყოფო ცენტრში 79 შემთხვევა გამოვლინდა, აქედან რვა ახალი ვარიანტით ინფიცირების შემთხვევაა, რაც სეკვენირების მეშვეობით დადასტურდა“, – ნათქვამია უწყების განცხადებაში.
წინასწარი მონაცემებით, სპეციალისტები არ მიიჩნევენ, რომ ის უფრო საშიშია და უფრო ადვილად გადაეცემა. სპეციალისტები განაგრძობენ ვირუსის ანალიზს და გეგმავენ დაადგინონ, თუ როგორ რეაგირებს ეს ვარიანტი ვაქცინაციასა და ანტისხეულებზე, რომლებიც წინა ინფიცირების დროს გამომუშავდა.
ფრანგმა სპეციალისტებმა ვირუსის ეს ვარიანტი ჯანმოს საწყის კატეგორიას მიაკუთვნეს – „ვარიანტი დაკვირვების ქვეშ“ (VUI). ექსპერტების შეფასების შემდეგ, განსაკუთრებული თვისებების გამოვლენის შემთხვევაში, ის შეიძლება მიაკუთვნონ კატეგორიას „პრობლემური ვარიანტები“ (VOC).
საფრანგეთის ხელისუფლებამ ახალი ვარიანტის შესახებ ჯანდაცვის საერთაშორისო ორგანოებს უკვე მიაწოდა ინფორმაცია. ქვეყანაში სულ გამოვლინდა COVID-19-ის 4 მილიონზე მეტი შემთხვევა, გარდაიცვალა თითქმის 90,8 ათასი ადამიანი.