თბილისი, 19 იანვარი — Sputnik. კავშირი მეხუთე თაობის (5G) საკომუნიკაციო ქსელების განთავსებასა და კორონავირუსით ინფიცირებას შორის შეთხზულია და რეალობას არ შეესაბამება, წერს РИА Новости საერთაშორისო კონსალტინგური კომპანია Deloitte-ს კვლევაზე დაყრდნობით.
„თეორია, თითქოს 5G ტექნოლოგია COVID-19-ის გადადებას უწყობს ხელს, უბრალოდ უგუნურებაა, რადგან ეს შეუძლებელია. COVID-19 არის ვირუსი, რომელიც ვრცელდება ჰაერ-წვეთოვანი გზით და გადადის ადამიანიდან ადამიანზე. ვირუსს არ შეუძლია გავრცელდეს რადიოტალღებით“, — ნათქვამია კვლევაში.
ანალიტიკოსები აღნიშნავენ, რომ ასევე მცდარია 5G-სთან დაკავშირებული დეზინფორმაციის ის ვერსიაც, თითქოს 5G არის გამოსხივების წყარო, რომელიც ასუსტებს ადამიანების იმუნურ სისტემას, რაც მათ მეტად მოწყვლადს ხდის ინფექციური დაავადებების მიმართ.
ამასთან კვლევის ავტორები პროგნოზირებენ, რომ COVID-19-ის შემთხვევებზე 5G-ს გავლენასთან დაკავშირებული ცრუ თეორიები 2021 წელს ისეთივე გავრცელებული იქნება, როგორც ეს 2020 წელს იყო.
აღსანიშნავია, რომ მანამდე აშშ-ის აერონავტიკის რადიოტექნიკური კომისიის (RTCA) სპეციალისტებმა გამოაქვეყნეს ანგარიში, რომლის თანახმადაც 5G ანძების მუშაობას გარკვეულ სიხშირეებზე შეუძლია ხარვეზები შეუქმნას ლაინერების სიმაღლის მზომ რადარებს, რასაც შეუძლია გავლენა მოახდინოს როგორც აშშ-ის, ისე მთელი მსოფლიოს ავიაციაზე და არაერთი ავიაკატასტროფა გამოიწვიოს მრავალრიცხოვანი მსხვერპლით.
