თბილისი, 18 ნოემბერი — Sputnik. ბიტკოინის კურსმა, პირველად 2017 წლის დეკემბრის შემდეგ, $18.000 ნიშნულს გადააბიჯა, წერს გამოცემა Forbes ელექტრონული კრიპტოვალუტის ბირჟა Coindesk-ისა და პორტალ Coinmarketcap-ის მონაცემებზე დაყრდნობით.
დღევანდელი მონაცემებით, კრიპტოვალუტის კურსი 18.174 აშშ დოლარია.
ბოლოს ბიტკოინი დაახლოებით ამდენივე 2017 წლის დეკემბერში ღირდა, როდესაც 8 დეკემბერს მისმა ფასმა $18.328-ს მიაღწია. უკვე ათი დღის შემდეგ კი, 17 დეკემბერს კრიპტოვალუტაზე მაქსიმალური ფასი – 19.666 აშშ დოლარი დაფიქსირდა.
წელს ბიტკოინის ღირებულება ორჯერ და მეტად გაიზარდა, რითიც 2017 წლის დინამიკა გაიმეორა — როდესაც კრიპტოვალუტის ფასმა ჯერ 1375 პროცენტით მოიმატა, მომდევნო წელს კი 70%-ით დაეცა.
როგორც Bloomberg-ი წერს, კრიპტოვალუტის წარმატება უოლ-სტრიტის მხრიდან მის მიმარ ინტერესის გაზრდითაა გამოწვეული.
სააგენტო წერს, რომ ბიტკოინის მომხრეებს იმედი აქვთ, რომ კრიპტოვალუტა მიაღწევს და გადააჭარბებს კიდეც 2017 წლის დეკემბრის რეკორდულ ნიშნულს.
„ბიტკოინი — ეს სიგიჟეა. ერთმა ღმერთმა იცის, სადამდე გაიზრდება“, – განაცხადა სააგენტოსთან საუბრისას Miller Tabak+Co-ს საბაზრო სტრატეგმა მეტ მეილიმ.
თუმცა, ზოგი ექსპერტი პერსპექტივას სკეპტიკურად უყურებს და უკუსვლას ელოდებიან. გამომდინარე იქიდან, რომ წარსულში დიდ წინსვლას ყოველთვის სდევდა 30–40%-იანი კორექცია, „არც ახლა არსებობს მიზეზი იმის სავარაუდოდ, რომ ყველაფერი სხვაგვარად იქნება“, – მიაჩნია კრიპტობირჟა Luno-ს ხელმძღვანელ ვიჯაი აიიარს.
