თბილისი, 23 ივლისი — Sputnik. კორონავირუსის მიმართ იმუნიტეტის ფორმირებას შესაძლოა დასჭირდეს ვაქცინის არა ერთი, არამედ რამდენიმე დოზა, განაცხადა კორპორაცია Microsoft-ის დამფუძნებელმა ბილ გეიტსმა, რომლის ფონდმაც 300 მლნ დოლარი გამოყო COVID-19-თან ბრძოლისთვის.
აღნიშნულის თაობაზე იუწყება ტელეარხი CBS News.
„დღეისათვის არც ერთ ვაქცინას არ უჩვენებია მოქმედების დაწყება ერთი დოზის შეყვანის შემდეგ. თავდაპირველად ამის იმედი არსებობდა“, — განუცხადა გეიტსმა ტელეარხს.
ამასთან, მან არ გამორიცხა, რომ რომელიმე ვაქცინა, განსაკუთრებით, მეორე თაობისა, ნამდვილად შეძლებს „გაოცებას“.
„იმედი გვაქვს, რომ სულ ორი [დოზა იქნება საკმარისი]. თუმცა ასაკოვანი ადამიანების შემთხვევაში შესაძლოა ზოგჯერ მეტიც გახდეს საჭირო“, — განმარტა Microsoft-ის დამფუძნებელმა.
აღსანიშნავია, რომ ბილ გეიტსის ფონდი ჯანდაცვის მსოფლიო ორგანიზაციის მეორე უმსხვილესი დონორია, რომელიც 2018-2019 წლებში 9,76%-ით ავსებდა ორგანიზაციის ბიუჯეტს. ფონდი წამლებისა და ვაქცინების სფეროში კვლევების დაფინანსებითაა დაკავებული.