თბილისი, 7 ივლისი — Sputnik. საფრანგეთში აღშფოთებულმა მგზავრებმა, რომელთაც მძღოლმა ტრანსპორტში ინდივიდუალური დაცვის საშუალების გარეშე შეშვებაზე უარი უთხრა, ის ისე სცემეს, რომ ექიმებმა მას ტვინის სიკვდილის დიაგნოზი დაუსვეს, იუწყება გამოცემა SudOuest.
გავრცელებული ინფორმაციით, უნიღბო და უბილეთო აგრესიულმა მგზავრებმა ავტობუსში ასვლა ქალაქ ბაიონაში სცადეს, მაგრამ დაახლოებით 50 წლის მძღოლმა მათ სალონისკენ მიმავალი გზა გადაუღობა. ამ დროს მან რამდენიმე ძლიერი დარტყმა მიიღო, მათ შორის თავის არეში.
„ამჟამად ერთ-ერთი თავდამსხმელი დაკავებულია, დანარჩენები კი იძებნებიან. მძღოლი უგონო მდგომარეობაში საავადმყოფოში გადაიყვანეს, ორშაბათს ექიმებმა მას ტვინის სიკვდილის დიაგნოზი დაუსვეს“, — აცნობა გამოცემას პოლიციაში არსებულმა წყარომ.
გარდაცვლილის რამდენიმე კოლეგამ პროტესტის ნიშნად ავტობუსის ხაზზე გაყვანაზე უარი თქვა, რის გამოც რეგიონული კომუნიკაცია შეფერხდა. ავტობუსების კომპანიამ თავის თანამშრომელს მხარი დაუჭირა და განაცხადა, რომ ორგანიზებული გაფიცვა აბსოლუტურად ლეგალურია და კანონიერი.
გამოცემა წერს, რომ ბოლო დღეებში საფრანგეთში აგრესიული თავდასხმების რიცხვი მნიშვნელოვნად გაიზარდა.
„მგზავრები თავიანთ ბრაზს, გულისწყრომას მძღოლებზე იყრიან. მაგრამ ისინი არაფერში არ არიან დამნაშავე, რადგან უბრალოდ ხელისუფლების განკარგულებებს ასრულებენ“, — აცხადებენ გადამზიდავ კომპანიაში.
