თბილისი, 11 მაისი — Sputnik. შექმნილია კალკულატორი, რომელიც კორონავირუსით ინფიცირების შემთხვევაში ლეტალური შედეგის რისკს განსაზღვრავს, აცხადებენ პოლონელი მეცნიერები.
პომორის სამეცნიერო-ტექნოლოგიური ცენტრის წარმომადგენლის მაგდოლენა მალარა-შვიტონსკაიას თქმით, პროგრამა, რომლის შექმნაშიც ექიმებმა და ეპიდემიოლოგებმა მიიღეს მონაწილეობა, „ითვალისწინებს ადამიანის ასაკს, სქესს და ასევე ქრონიკული დაავადებების ოთხ ძირითად ტიპს“.
კალკულატორი გამოთვლებს აწარმოებს გულ-სისხლძარღვთა დაავადებების, სისხლის მაღალი წნევის, შაქრიანი დიაბეტისა და ონკოლოგიური დაავადებების გათვალისწინებით.
„COVID-19-ით სიკვდილის რისკი ძალიანაა დამოკიდებული ცხოვრების წესსა და მასთან დაკავშირებულ დაავადებებზე, მათ შორის ჭარბცხიმიანობაზე, დიაბეტზე, ჰიპერტონიასა და სხვა გართულებებზე. უკანასკნელი მონაცემები აჩვენებს, რომ COVID-19-ით დაღუპულთა შორის ქრონიკული დაავადებების არმქონეთა რაოდენობა 1%-ზე ნაკლებს შეადგენს“, — განაცხადა კალკულატორის მთავარმა შემქმნელმა, მედიცინის მეცნიერებათა დოქტორმა პეტრ ბანდოშმა.
კალკულატორის ტესტირებამ აჩვენა, რომ კორონავირუსით ინფიცირების შემთხვევაში სიკვდილის რისკი ქრონიკული დაავადებების არმქონე 30 წლის მამაკაცისთვის 0,03%-ია, ხოლო ქალისთვის — 0,02%. შაქრიანი დიაბეტისა და ონკოლოგიის მქონე 80 წლის მამაკაცისთვის ეს რისკი 25,86%-მდე იზრდება, ხოლო იმავე ასაკისა და დაავადებების მქონე ქალისთვის —14,03%-მდე.
ჯონს ჰოპკინსის უნივერსიტეტის სპეციალური პროექტის მონაცემებით, ვირუსის აფეთქების მომენტიდან დღემდე, ახალი კორონავირუსით ინფიცირება სულ 4 118 783 ადამიანს დაუდგინდა. აქედან გარდაიცვალა 282 947 და განიკურნა 1 418 656 კაცი.
