თბილისი, 5 მაისი — Sputnik. მსოფლიოს სხვადასხვა ქვეყანაში COVID-19-ის გამომწვევი ვირუსით პირველი დაინფიცირება შესაძლოა ჯერ კიდევ გასული წლის დეკემბერში მოხდა, განაცხადა ჯანმოს ოფიციალურმა წარმომადგენელმა კრისტიან ლინდმაიერმა ბრიფინგზე.
აღნიშნული კომენტარი მან იმ ინფორმაციაზე გააკეთა, რომლის თანახმადაც, საფრანგეთში ახალი კორონავირუსით ინფიცირების შემთხვევა 2019 წლის დეკემბერში გამოვლინდა.
„ეს საინტერესო აღმოჩენაა, რომელიც ხელს შეუწყობს COVID-19-ის პოტენციური გავრცელების უკეთ გაგებას. ეს გასაკვირი არ არის, ვინაიდან ვირუსის ყველაზე ადრეული შემთხვევები დეკემბრის დასაწყისში დარეგისტრირდა. ასე რომ, შესაძლოა უჰანში ინფიცირებული ადამიანები სხვა ქვეყნებში მოგზაურობდნენ“, — განაცხადა ლინდმაიერმა.
მისი თმით, ასევე შესაძლებელია, რომ ქვეყნებში შემთხვევათა ტესტირების კვალდაკვალ კიდევ უფრო ადრეული შემთხვევები გამოვლინდეს.
მსოფლიო ჯანდაცვის ორგანიზაციამ ახალი კორონავირუსის COVID-19-ის აფეთქება 11 მარტს პანდემიად გამოაცხადა. ჯონს ჰოპკინსის უნივერსიტეტის სპეციალური პროექტის მონაცემებით, ვირუსის აფეთქების მომენტიდან დღემდე, COVID-19 მსოფლიოში 3 600 106 ადამიანს დაუდასტურდა. აქედან გარდაიცვალა 251 898 და განიკურნა 1 173 147 კაცი.