თბილისი, 16 დეკემბერი — Sputnik. პენტაგონი მიმართავს ძალისხმევას, რათა ამერიკული სამხედრო ბაზების შესაძლო დახურვასთან დაკავშირებით ანკარის განცხადების შემდეგ თურქეთთან ურთიერთობები შეინარჩუნოს, იუწყება საინფორმაციო სააგენტო РИА Новости უწყების წარმომადგენელზე დაყრდნობით.
მანამდე თურქეთის პრეზიდენტი რეჯეფ თაიიფ ერდოღანი ანკარის მიმართ დაწესებული ამერიკული სანქციების საპასუხოდ აშშ-ს ინჯირლიკისა და კიურეჯიკის სამხედრო ბაზების დახურვით დაემუქრა.
„თურქეთში ჩვენი ძალების სტატუსს განვიხილავთ როგორც ათობით წლიანი ვალდებულების სიმბოლოს – ვიმუშაოთ და დავეხმაროთ თავდაცვაში ჩვენს ნატოელ მოკავშირესა და სტრატეგიულ პარტნიორ თურქეთს... სამინისტრო მიმართავს ძალისხმევას, შეინარჩუნოს ეს ურთიერთობები და, ამასთან, წაახალისოს თურქეთი უფრო კონსტრუქციული პოლიტიკისადმი С-400-ისა და სირიის საკითხებში და ასევე სხვა ასპექტებში, სადაც რაიმე უთანხმოება არსებობს“, — განაცხადა პენტაგონის წარმომადგენელმა.
ამასთან, მან ხაზი გაუსვა თურქეთის როლს ავღანეთის, კოსოვოსა და ასევე ერაყის საკითხებში.
თურქეთის სამხრეთში მდებარე ავიაბაზა ინჯირლიკით ამერიკული სამხედრო-საჰაერო ძალები სარგებლობს, ხოლო ქვეყნის სამხრეთ-აღმოსავლეთში მდებარე კიურეჯიკის ბაზაზე დისლოცირებულია სარაკეტო თავდასხმის ადრეული შეტყობინების რადიოლოკაციური სადგური, რომელიც ევროპაში ნატოს რაკეტსაწინააღმდეგო თავდაცვის სისტემის ნაწილია.
რუსული ჰაერსაწინააღმდეგო თავდაცვის С-400 სისტემების თურქეთისთვის მიწოდება, რამაც ანკარასა და ვაშინგტონს შორის ურთიერთობა დაძაბა, ივლისში დაიწყო. თურქეთში აცხადებენ, რომ С-400-ის სისტემები 2020 წლის აპრილიდან ამოქმედდება. ვაშინგტონი ითხოვს გარიგებაზე უარის თქმას და თურქეთს მათ სანაცვლოდ ამერიკული Patriot-ის შეძენას სთავაზობს, წინააღმდეგ შემთხვევაში კი თურქეთისთვის F-35-ის მიწოდების შეჩერებით, ასევე სანქციების დაწესებით იმუქრება. ანკარამ დათმობაზე უარი განაცხადა. ერდოღანის თქმით, C-400 მოქმედებაში სრულად 2020 წლის აპრილიდან შევა.
