თბილისი, 20 ნოემბერი — Sputnik. ორი ადამიანი დაიღუპა და რამდენიმე დაშავდა ისრაელის სამხედროების მიერ სირიის ობიექტების დაბომბვისას, იუწყება სააგენტო SANA წყაროზე დაყრდნობით.
თელ-ავივის მიერ გუშინ გავრცელებული ინფორმაციით, მათ სირიიდან გაშვებული ოთხი რაკეტა „ჩაიჭირეს“, რის შემდეგაც ისრაელმა სირიაში მდებარე ათობით სამიზნეზე მიიტანა შეტევა.
„დაიღუპნენ მამაკაცი და ქალი, ბევრი ადამიანი დაიჭრა დამასკოდან სამხრეთ-დასავლეთით მდებარე პატარა ქალაქ ბეით-საბერზე შეტევის შედეგად“, — განუცხადეს სააგენტოს ადგილობრივ საავადმყოფოში.
გავრცელებული ინფორმაციით, დაღუპულები შინ იმყოფებოდნენ, როდესაც მათ სახლს რაკეტა მოხვდა. დაჭრილები საავადმყოფოებში არიან გადაყვანილი. დამასკოს სხვა გარეუბანზე შეტევისას დაშავდა კიდევ ერთი ახალგაზრდა ქალი.
არსებული ცნობით, ისრაელმა დაახლოებით 20 ობიექტზე მიიტანა იერიში, რომელთაგან ნახევარზე მეტი ირანის ძალებს ეკუთვნის. ერთ-ერთ შენობაში, სავარაუდოდ, ირანული ძალების „ისლამური რევოლუციის მცველთა კორპუსის“ შტაბ-ბინაა განთავსებული. თუმცა, როგორც ისრაელის სამხედროები განმარტავენ, მათ განზრახ არ გაანადგურეს ის სრულად.
ისრაელის სამხედრო-საჰაერო ძალების მოქმედება დაგმეს რუსეთის საგარეო საქმეთა სამინისტროში. მინისტრის მოადგილემ მიხაილ ბოგდანოვმა ეს უმართებულო ნაბიჯად შეაფასა.
„სუვერენული სახელმწიფოს ტერიტორიაზე შეტევის მიტანა სრულიად ეწინააღმდეგება საერთაშორისო სამართლის ნორმებს და არასაჭირო დაძაბულობას იწვევს“, – განაცხადა მან.
სირიასა და ისრაელს დიპლომატიური ურთიერთობები არ აქვთ. ორი ქვეყანა, სახელმწიფოებად ჩამოყალიბების მომენტიდან, ერთმანეთთან ომის მდგომარეობაში არიან. ისრაელის სამხედროებმა მანამდე არაერთხელ მიიტანეს შეტევა სირიაში მდებარე ობიექტებზე იმ მიზნით, რომ მტრის ხელში თანამედროვე იარაღის მოხვედრა არ დაუშვან. ამაში უპირველესად იგულისხმება „ჰესბოლა“, რომელიც ბაშარ ასადის მხარეს იბრძვის და თეირანის კონტროლქვეშაა.
