თბილისი, 17 სექტემბერი — Sputnik. ფილიპინებზე ტაიფუნ „მანგჰუტის" შედეგად დაღუპულთა რიცხვმა 65-ს მიაღწია, იუწყება РИА Новости პორტალ Rappler-ზე დაყრდნობით.
მანამდე ვრცელდებოდა ინფორმაცია, რომ 59 ადამიანი დაიღუპა, 16 კი უგზოუკვლოდ დაკარგულად ითვლებოდა.
„ტაიფუნ „მანგჰუტის" შედეგად დაღუპულთა რიცხვი ორშაბათს, 17 სექტემბერს, 65-მდე გაიზარდა, მათგან 54 კორდილიერის ადმინისტრაციულ რეგიონში", - ნათქვამია პორტალზე გავრცელებულ განცხადებაში.
გარდა ამისა, როგორც განცხადებაშია აღნიშნული, 43 ადამიანი უგზოუკვლოდ დაკარგულად ითვლება, 64-მა კი სხეულის დაზიანებები მიიღო.
ძლიერმა ტაიფუნმა „მანგჰუტმა" ფილიპინების ჩრდილო-აღმოსავლეთ სანაპიროს პარასკევს საღამოს მიაღწია. ატმოსფერული, გეოფიზიკური და ასტრონომიული სამსახურის (PAGASA) ცნობით, არქიპელაგის ზოგიერთ კუნძულზე ქარის სიჩქარე საათში 170 კილომეტრს, ხოლო ლუსონის ჩრდილოეთით ქარის სიმაღლე კი 6 მეტრს აღწევდა. ადგილობრივი ხელისუფლების მონაცემებით, ტაიფუნი რეგიონში მცხოვრებ 250 ათასზე მეტ ადამიანს შეეხო, ამ დროისთვის მათი ნაწილი ევაკუაციის ცენტრებში არიან გადანაწილებული.