თბილისი, 16 ივლისი — Sputnik. ბელგიის საგარეო საქმეთა მინისტრი დიდიე რეინდერსი იმედოვნებს, რომ აშშ-ის პრეზიდენტი დონალდ ტრამპი რუსეთის პრეზიდენტ ვლადიმირ პუტინთან შეხვედრაზე უკრაინისა და საქართველოს საკითხებს წამოჭრის, იუწყება საინფორმაციო სააგენტო РИА Новости.
პუტინი და ტრამპი ორშაბათს, 16 ივლისს ჰელსინკიში (ფინეთი) გამართავენ შეხვედრას. პრეზიდენტები შეხვედრაზე იმსჯელებენ ორმხრივი ურთიერთობების განვითარებაზე და საერთაშორისო დღის წესრიგის აქტუალურ საკითხებზე. ეს ორი პრეზიდენტის პირველი სრულფორმატიანი მოლაპარაკებები იქნება.
„მნიშვნელოვანია, რომ დღეს განვიხილავთ (ბრიუსელში) „აღმოსავლეთ პარტნიორობის" საკითხებს, უნდა გვახსოვდეს სიტუაცია უკრაინაში… ასევე ვითარება საქართველოში და რეგიონში რუსეთის სამხედრო არსებობა. იმედი მაქვს, რომ პრეზიდენტი ტრამპი ასევე დააყენებს ამ საკითხებს", — განუცხადა ჟურნალისტებს რეინდერსმა საგარეო საკითხებში ევროკავშირის საბჭოს სხდომის დაწყების წინ ბრიუსელში.
