თბილისი, 19 ივნისი — Sputnik. საფრანგეთში გამართული არჩევნების მეორე ტურის შედეგების მიხედვით, საფრანგეთის პრეზიდენტ ემანუელ მაკრონის მოძრაობა „წინ რესპუბლიკის“ კანდიდატებმა ეროვნული საკრებულოში 577 ადგილიდან 308 მოიპოვეს, იუწყება საინფორმაციო სააგენტო РИА Новости ქვეყნის შსს-ზე დაყრდნობით.
კიდევ 42 მანდატი მოიპოვა პრეზიდენტის მოძრაობის მოკავშირე – ცენტრისტების პარტიამ „დემოკრატიული მოძრაობა“ (MoDem). ასე რომ, მაკრონის მოძრაობას ეროვნულ საკრებულოში ხმების აბსოლუტური უმრავლესობა აქვს.
მემარჯვენე-ცენტრისტულმა პარტიამ „რესპუბლიკელები“ 113 სადეპუტატო მანდატი მოიპოვა, სოციალისტურმა პარტიამ — 29, მემარჯვენე-ცენტრისტულმა „დემოკრატებისა და დამოუკიდებლების კავშირმა“ – 18, ჟან-ლუკ მელანშონის „დაუმარცხებელმა საფრანგეთმა“ — 10 და მარინ ლე პენის „ეროვნულმა ფრონტმა“ – 8.
