თბილისი, 18 თებერვალი — Sputnik. ჩინეთის ქალაქ ჩენჩჟოუს ჩქაროსნული მატარებლების სადგურში პირველი რობოტი-პატრული გამოჩნდა, იუწყება საინფორმაციო სააგენტო РИА Новости სააგენტო China News Service-ზე დაყრდნობით.
რობოტი ადამიანის დაუხმარებლად ეწევა პატრულირებას, ასკანირებს და იცნობს პიროვნებას, პასუხობს მგზავრების შეკითხვებს, აფიქსირებს ჰაერის ტემპერატურას და წინასწარ გრძნობს ხანძრის საფრთხეს.
გავრცელებული ინფორმაციის თანახმად, რობოტი ერთი კვირის განმავლობაში სატესტო რეჟიმში იმუშავებს, რის შემდეგაც ღამის საათებში მუდმივ მორიგეობაზე გადაიყვანენ.
ფოტოებზე, რომლებსაც სააგენტო აქვეყნებს, ჩანს, რომ ადამიანზე დაბალი შავ-თეთრი რობოტი, რომელიც გორგოლაჭებზე მოძრაობს, უამრავი სენსორითაა აღჭურვილი.
ეს ჩინეთში რობოტი-პატრულის „დასაქმების“ პირველი შემთხვევა არაა. 2016 წლის ბოლოდან ერთ-ერთ აეროპორტში რობოტი AnBot-ი პატრულირებს და „პირნათლად“ ასრულებს დაკისრებულ მოვალეობას.
