თბილისი, 13 იანვარი — Sputnik. კორპორაცია Samsung Electronics-ის თავმჯდომარის ვაჟის ლი ჩჟე იონის დაკითხვა, რომელიც უკვე რამდენიმე წელია კომპანიის ფაქტობრივი ხელმძღვანელის მოვალეობას ასრულებს მამის ავადმყოფობასთან დაკავშირებით, 22 საათის განმავლობაში გრძელდებოდა, იუწყება საინფორმაციო სააგენტო РИА Новости სააგენტო „რიონჰაპზე“ დაყრდნობით.
დაკითხვაზე, რომელიც ხუთშაბათის დილით დაიწყო და პარასკევის დილით დასრულდა, ლი ჩჟე იონი სპეცკომისიამ გამოიძახა, რომელიც ქვეყნის პრეზიდენტის კორუფციულ სკანდალში ჩართულობის საქმეს იძიებს. კომისიამ ის ეჭვმიტანილის რანგში დაკითხა, თუმცა მის დაკავებაზე გადაწყვეტილება ჯერჯერობით არ მიუღია.
სააგენტო „რიონჰაპი“ გამოძიებასთან დაახლოებულ წყაროზე დაყრდნობით იუწყება, რომ ლი ჩჟე იონმა დაკითხვაზე პრეზიდენტ პაკ კინ ჰეს წინააღმდეგ მისცა ჩვენება. მისი თქმით, ქვეყნის პრეზიდენტი აიძულებდა მის კომპანიას, გადაერიცხა თანხები ორგანიზაციებისთვის, რომლებიც ქვეყნის მეთაურის მეგობარ ქალბატონს ცოი სუნ სილს უკავშირდებოდა.
სწორედ ეს უკანასკნელი იყო აგორებული სკანდალის მთავარი ფიგურანტი, რაც იქცა კიდეც პრეზიდენტისთვის იმპიჩმენტის გამოცხადების საფუძვლად.
გამოძიების ვარაუდით, Samsung Electronics-მა ცოი სუნ სილის მხოლოდ გერმანიაში არსებულ კომპანიებს 22 მლრდ ვონი (18 მილიონი აშშ დოლარი) გადაურიცხა.