თბილისი, 30 აპრილი — Sputnik. რუსეთის თავდაცვის სამინისტროს წარმომადგენელმა პენტაგონის განცხადებას უპასუხა, რომელიც რუსულოი სუ 27–ის მიერ ბალტიის ზღვაზე ამერიკული მზვერავი თვითმფრინავის „ჩაჭერას“ ეხებოდა.
პენტაგონის ინფორმაციით, ამერიკული მზვერავი RC-135 რუსულმა სუ 27–მა „სახიფათოდ და არაპროფესიულად „ჩაიჭირა“.
„ჩვენ უკვე შევეჩვიეთ პენტაგონის წარმომადგენლების წყენას ჩვენი გამანადგურებლების თითქოსდა არაპროფესიული მანევრების შესახებ რუსეთის საზღვრებთან ამერიკული მზვერავი თვითმფრინავების „ჩაჭერისას“, — განაცხადა რუსეთის თავდაცვის სამინისტროს ოფიციალურმა წარმომადგენელმა, გენერალ–მაიორმა იგორ კონაშენკოვმა.
მან ხაზი გაუსვა, რომ რუსული თვითმფრინავების ყველა გაფრენა საჰაერო სივრცის შესახებ საერთაშორისო კანონების დაცვით ხორციელდება.
„გვინდა ყურადღება გავამახვილოთ იმ ფაქტზე, რომ მზვერავი თვითმფრინავი RC-135U გამუდმებით ცდილობს გამორთული ტრანსპონდერით ფარულად მოუახლოვდეს რუსეთის საზღვრებს. ამიტომ ჰაერსაწინააღმდეგო თავდაცვის ძალებს გამანადგურებლის გაშვება უწევს, რათა თვითმფრინავის საბორტო ნომრისა და ტიპის ვიზუალური იდენტიფიკაცია მოახდინოს“, — დაამატა კონაშენკოვმა.
მან აგრეთვე განაცხადა, რომ სხვა ამერიკული მზვერავი თვითმფრინავი Boeing OC-135B, „ღია ცის“ საერთაშორისო ხელშეკრულების ფარგლებში, დღეს მშვიდობიანად დაჯდა ულან–უდეში ისე, რომ მის ამოსაცნობად და იდენტიფიკაციისთვის რუსეთს გამანადგურებელი არ გაუშვია.
