თბილისი, 8 სექტემბერი — Sputnik. საგანგებო სიტუაციების მართვის სამსახური მოსახლეობას შავი ზღვის სანაპიროზე შტორმის შესახებ აფრთხილებს.
გავრცელებული ინფორმაციით, 8 სექტემბერს შავი ზღვის სანაპიროზე ფიქსირდება 5-ბალიანი შტორმი, ტალღების სიმაღლე 4 მეტრს აღწევს. შავ ზღვაში ბანაობა აკრძალულია.
„ზღვის სანაპიროზე, ყველა სამაშველო კოშკურაზე აღმართულია წითელი ალამი. კოშკურებზე თეთრი ალმის აღმართვის შემთხვევაში ზღვაში ბანაობა ნებადართული იქნება. ყურადღება მიაქციეთ ამკრძალავ ნიშნებს“, — ნათქვამია განცხადებაში.
უწყების ინფორმაციით, მიუხედავად საშტორმო გაფრთხილებისა, 12:00 საათიდან — 14:00 საათამდე საზღვაო მაშველებმა ზღვიდან 12 მოქალაქე გამოიყვანეს უვნებლად.
უწყება მოქალაქეებს მოუწოდებს დაემორჩილონ მაშველების რეკომენდაციებს. აკრძალვა მოქმედებს 9 სექტემბრის 10:00 საათამდე.
საგანგებო სიტუაციების მართვის სააგენტოს მაშველებმა საზღვაო სეზონზე შავი ზღვის სანაპირო ზოლზე შტორმისა და სხვა საგანგებო მდგომარეობის დროს გადაარჩინეს 316 ადამიანი – საქართველოსა და სხვა ქვეყნების მოქალაქეები.
რაც შეეხება გადარჩენილი ადამიანების სტატისტიკას, მაშველებმა ზღვაში დახრჩობას 240 ადამიანი გადაარჩინეს, მდინარეში დახრჩობას – 27, ტბაში — 49.
