თბილისი, 12 დეკემბერი — Sputnik. სამტრედიის რაიონის სოფელ ბაშში ნაპირებიდან გადმოსულმა რიონმა გზები და საცხოვრებელი სახლების პირველი სართულები დატბორა, იუწყება ტელეარხი „რუსთავი-2“.
ადგილობრივი მოსახლეობა დამცავი ჯებირის აშენებას მოითხოვს, რადგან მსგავსი სიტუაცია ყოველი ძლიერი წვიმის შემდეგ მეორდება.
„დამცავი ჯებირის აშენებას მოვითხოვთ. მდინარე ნაპირებიდან გადმოვიდა და ჩვენი სახლები დატბორა. 10-15 ოჯახი ასეთ მდგომარეობაშია“, — აცხადებს ადგილობრივი მკვიდრი გოგოლა ახობაძე.
ძლიერი წვიმების შედეგად, ასევე დაიტბორა თავად ქალაქ სამტრედიის ქუჩები და შენობების პირველი სართულები.
