თბილისი, 31 მარტი - Sputnik. საქართველოს პრეზიდენტი სალომე ზურაბიშვილი საფრანგეთის სახელმწიფო ავიაკომპანია Air France-ის საინაუგურაციო რეისით იმგზავრებს, იუწყება საზოგადოებრივი მაუწყებლის პირველი არხი.
ავიაკომპანია ორწლიანი მოლაპარაკების შემდეგ საქართველოს საავიაციო ბაზარზე ოპერირებას იწყებს.
Airbus A 320 ტიპის საჰაერო ხომალდი შოთა რუსთაველის სახელობის თბილისის საერთაშორისო აეროპორტში დღეს 20:10 საათზე დაეშვება.
აეროპორტის სამთავრობო მომსახურების ტერმინალში საზეიმო მიღება გაიმართება, რომელსაც მთავრობის წევრები და კერძო სექტორის წარმომადგენლები დაესწრებიან.
რეგულარულ ფრენებს პარიზი–თბილისის რეისით კვირაში ორჯერ – კვირას და ოთხშაბათს Airbus A320 და A321 მარკის საჰაერო ხომალდები განახორციელებენ. თბილისიდან საფრანგეთის დედაქალაქში ფრენები ორშაბათს და ხუთშაბათს შესრულდება.
შესაბამისი ნებართვა Air France-ს საქართველოს სამოქალაქო ავიაციის სააგენტომ მიანიჭა. რეგულარული ფრენები 2019 წლის 23 ოქტომბრამდე განხორციელდება.
რეგულარულად, კვირაში ორჯერ ქვეყნებს შორის იფრენს აგრეთვე ქართული ავიაკომპანია Georgian Airways – Airzena.
დღეისთვის კომპანია Air France ფრენებს მსოფლიოს 92 ქვეყანაში ახორციელებს 195 მიმართულებით. კომპანიის ავიაპარკი სხვადასხვა ტიპის 212 საჰაერო ხომალდისგან, ქართული Airzena-ს ავიაპარკი კი სხვადასხვა ტიპის შვიდი ხომალდისგან შედგება.