თბილისი, 11 დეკემბერი — Sputnik. საერთაშორისო რუსული ტუროპერატორი TEZ TOUR 2018 წლის ზაფხულში გეგმავს ფრენის პროგრამის დაწყებას მარშრუტით მოსკოვი-ბათუმი-მოსკოვი, აღნიშნულია ტუროპერატორის ვებ-გვერდზე.
საზაფხულო პროგრამა 2018 წლის 8 ივნისს დაიწყება და 30 სექტემბრამდე გაგრძელდება. ფრენებს ავიაკომპანია S7 განახორციელებს კვირაში ხუთჯერ — ორშაბათს, სამშაბათს, ხუთშაბათს, პარასკევსა და კვირას.
ტურისტები დასვენებას შეძლებენ ბათუმის, გონიოს, კვარიათის, სარფისა და ქობულეთის 70 სასტუმროში.
„აჭარა, ტურისტული ინფრასტრუქტურის კუთხით, დინამიკურად ვითარდება და მუდამ სრულყოფილებისკენ ისწრაფვის. მიმართულების ძირითადი პრიორიტეტებია — მომსახურების სფეროს გაუმჯობესება, მაღალმთიან რაიონებში ტურისტული პროდუქტების შექმნა. კარგი პლაჟების, უნიკალური სუბტროპიკული კლიმატის, გემრიელი სამზარეულოსა და თანამედროვე სასტუმროების გარდა, ტურისტებს მრავალი ღონისძიება და აქტიურობა ელოდებათ", — განაცხადა TEZ TOUR-ის PR-დირექტორმა ლარისა ახანოვამ.
„ადრეული დაჯავშნის" აქცია 30 აპრილამდე მოქმედებს და ფასდაკლება 15%-მდეა.
აჭარა საქართველოს ერთ-ერთი ყველაზე პოპულარული ტურისტული ადგილია. რეგიონს იანვრიდან სექტემბრის ჩათვლით დაახლოებით 1,2 მილიონი უცხოელი ეწვია, რაც გასული წლის ანალოგიური პერიოდის მონაცემებზე 5,4%-ით მეტია.