თბილისი, 6 დეკემბერი — Sputnik. საქართველოს ზამთრის საკურორტო სეზონის შესახებ საიმიჯო ვიდეორგოლი Winter in Georgia, რომელიც ტურიზმის ეროვნულმა ადმინისტრაციამ მოამზადა, ტელეარხ Euronews-ზე გადის.
არხის მრავალმილიონიან აუდიტორიას შესაძლებლობა აქვს გაეცნოს საქართველოს ზამთრის კურორტებს, ტურისტულ ადგილებს და მთლიანობაში ქვეყნის კულტურას.
Euronews-ზე სარეკლამო კამპანია 25 დეკემბრამდე გაგრძელდება, ნათქვამია ტურიზმის ადმინისტრაციის Facebook-გვერდზე.
საქართველოში სათხილამურო კურორტები ფუნქციონირებს გუდაურში, ბაკურიანში, მესტიასა და გოდერძის უღელტეხილზე.
ზამთრის სეზონის დადგომასთან ერთად გააქტიურდა საინფორმაციო კამპანია საქართველოს სამთო კურორტების პოპულარიზების მიზნით.
Euronews-ი "თბილისის აბრეშუმის გზის ფორუმისა" და თბილისში ტურის შესახებ სპეციალურ რეპორტაჟებსაც ამზადებს. ასევე თბილისის ტურს მიეძღვნება ვიდეორგოლიც, რომელიც წამყვანი ევროპული ტელევიზიის ეთერით გადაიცემა.
Euronews-ს 400 მილიონზე მეტი მაყურებელი ჰყავს და 155 ქვეყანაში 14 ენაზე მაუწყებლობს.
ტურიზმის ეროვნული ადმინისტრაცია 2017-2018 წლების ზამთრის სეზონთან დაკავშირებით კამპანიას 19 ქვეყანაში ატარებს: გერმანია, იტალია, დიდი ბრიტანეთი, პოლონეთი, ლიტვა, ლატვია, ესტონეთი, უკრაინა, ბელორუსი, რუსეთი, აზერბაიჯანი, სომხეთი, ყაზახეთი, თურქეთი, ისრაელი, ქუვეითი, ბაჰრეინი, საუდის არაბეთი და არაბთა გაერთიანებული საამიროები.
ვიდეორგოლმა Winter in Georgia-მ ლატვიაში ტურისტულ ფესტივალზე Tourfilm Riga მთავარი პრიზი მიიღო. საქართველომ გაიმარჯვა ხორვატიაში Zagreb Tourfilm Festival-ზეც, სადაც ტურიზმის ადმინისტრაციას "სპეციალური პრიზი" გადასცეს. "ვერცხლის ჯილდო" მიიღო აგრეთვე საქართველომ აზერბაიჯანში საერთაშორისო ტურისტული ფილმების ფესტივალზე Baku International Tourism Film Festival.