თბილისი, 14 ივლისი — Sputnik. ბათუმსა და ურეკს შორის ახალი სარკინიგზო რეისი დაინიშნა, ნათქვამია აჭარის ტურიზმის დეპარტამენტის განცხადებაში.
სარკინიგზო რეისი ბათუმი-ურეკი-ბათუმი ყოველდღიურად დღეში ორჯერ შესრულდება და ბილეთის ღირებულება 4 ლარი იქნება.
300 მგზავრზე გათვლილი მატარებელი ბათუმიდან ურეკის მიმართულებით ყოველდღე 15:55 საათზე და 19:20 საათზე გავა, ურეკიდან ბათუმში კი 17:10 საათზე და 20:45 საათზე. მგზავრობა 1 საათსა და 5 წუთს გაგრძელდება.
„ეს პროექტი განტვირთავს ბათუმი-ქობულეთი-ურეკის მაგისტრალზე ზაფხულის აქტიურ ტურისტულ სეზონზე არსებულ გადატვირთულ მოძრაობას. ჩვენ გვაქვს შესაძლებლობა ადამიანებს შევთავაზოთ იაფი, ეკოლოგიურად სუფთა სატრანსპორტო საშუალება, რომელიც ზაფხულის სეზონზეა გათვლილი", — განაცხადა აჭარის ტურიზმის დეპარტამენტის თავმჯდომარემ სულხან ღლონტმა.
მატარებლის ბილეთის შეძენა სწრაფი გადახდის აპარატებში, ელექტრონულად და რკინიგზის სადგურის სალაროებშია შესაძლებელი, თუმცა მგზავრებს ბილეთის საფასურის გადახდა ვაგონშივე შეუძლიათ.
ბათუმი-ურეკის მატარებელი აჭარის ტურიზმის დეპარტამენტისა და "საქართველოს რკინიგზის" ერთობლივი პროექტია.
ბოლო წლებში საქართველოში ტურიზმის სფერო დინამიურად ვითარდება. ზაფხულის სეზონზე ტურისტების ძირითადი ნაკადი აჭარაზე მოდის, ხოლო ტურისტების ერთ-ერთ ყველაზე პოპულარულ ადგილს ბათუმი წარმოადგენს.
