ჩვენი რუბრიკის მეშვეობით თქვენ მიიღებთ უამრავ საინტერესო რჩევას, როგორ იმოგზაუროთ მაქსიმალურად მცირე დანახარჯებით.
დღევანდელ რუბრიკაში წარმოგიდგენთ კვიპროსის უმშვენიერეს ქალაქს — ლარნაკას. ლარნაკა კვიპროსის სამხრეთ-აღმოსავლეთ სანაპიროსთან მდებარეობს, ძირითადად ბერძულ სექტორში, დაახლოებით 85 000 მცხოვრებლით და 4-ათასწლიანი ისტორიით. ლარნაკა მდიდარია უძველესი კულტურით და, ამასთანავე, ერთ-ერთი თანამედროვე ევროპული ქალაქია — განსაცვიფრებლად ლამაზი ბუნებით, საოცრად ლურჯი ზღვით, სანაპირო ზოლში განთავსებული საუკეთესო პლაჟებით, პალმების ხეივნით, ბულვარით, მხიარული ტავერნებით, კოქტეილებითა და პლაჟიდან წამოსული მელოდიებით გაჟღენთილი ღამეებით.
რა არ უნდა გამოგრჩეთ ლარნაკაში მოგზაურობისას:
წმინდა ლაზარეს ეკლესია
ეკლესია იმ ადგილზეა აშენებული, სადაც წმინდა ლაზარეს საფლავია განთავსებული. აშენებულია IX საუკუნის ბოლოს. ამბობენ, რომ მკვდრეთით აღდგომის შემდეგ ლაზარემ კიდევ 30 წელს იცოცხლა. მეორედ გარდაცვალების შემდეგ კი უკვე მეორედ და უკანასკნელად დაკრძალეს ლარნაკაში.
მდებარეობა: ლარნაკას მთავარი მოედანი
ხალა სულთან ტეკეს მეჩეთი
მდებარეობა: ქალაქიდან დასავლეთით 3 კმ მანძილზე
მლაშე ტბები
ლარნაკას ყველაზე პოპულარული სანახაობა. წელიწადის ყველა დროს ულამაზესია, მაგრამ მის სანახავად საუკეთესო დრო ზამთრია (ნოემბრიდან მარტამდე შუალედში), როცა მას ვარდისფერი ფლამინგოები სტუმრობენ. მართლაც დაუვიწყარ შთაბეჭდილებას ტოვებს ათიათასობით ფერადი ფრინველი სარიტუალო ცეკვის შესრულებისას.
ზაფხულში წყალი ორთქლდება და რჩება მარილის უზარმაზარი მასა, რომელიც მზეზე საოცრად ბრწყინავს.
მდებარეობა: ხალა სულთან ტეკეს მეჩეთთან ახლოს
ლარნაკას ციხე-სიმაგრე
სანაპიროები
სტრავროვანის მონასტერი
მდებარეობა: ლარნაკადან 40 კმ დასავლეთით
სოფელი ლეფრაკა
ცნობილია საუცხოო არქიტექტურით და მაქმანის წარმოებით.
მდებარეობა: ქალაქიდან 38 კმ სამხრეთ-დასავლეთით
აია—ნაპას მონასტერი
ცნობილი ბიზანტიურ—ვენეციური მონასტერი
მდებარეობა: აია-ნაპას მთავარი მოედანი
თურქული უბანი თურქული სოფლის განსაკუთრებული ატმოსფეროთი
როგორ დავგეგმოთ მოგზაურობა ლარნაკაში
დაჯავშნეთ ბილეთები: ქუთაისის აეროპორტიდან ფრენა ლარნაკას მიმართულებით საშუალოდ 50-დან 400 ლარის ფარგლებში დაგიჯდებათ, ხოლო თუ „ვიზეარის“ ფასდაკლების კლუბის წევრი ხართ, შეღავათებითაც ისარგებლებთ. ფასდაკლების კლუბში გაწევრიანება ერთი წლით 30 ევრო ღირს, ეს დამატებითი ხარჯი გამართლებულია, თუ ხშირად მოგზაურობთ. მაგალითად, თუ ბილეთი 40 ევრო ღირს, ფასდაკლებით მას 30 ევროდ შეიძენთ.
გაითვალისწინეთ: ხშირად შეამოწმეთ „ვიზეარის“ ვებსაიტი და ეძებეთ ყველაზე დაბალფასიანი ბილეთები. მაგალითად, ივნისში ან ოქტობერში ლარნაკას მიმართულებით სულ რაღაც 42 ლარად იფრენთ. დაბალბიუჯეტიანი ფრენები უფრო ხელსაყრელია მათთვის, ვინც მკაცრად განსაზღვრული თარიღებით არ არის შეზღუდული და შეუძლია მოგზაურობა იმ დღეებში დაგეგმოს, როცა დაბალფასიანი ბილეთები იყიდება.
ბილეთის შეძენისას არ დაამატოთ არც ერთი ფასიანი სერვისი, თუ არ გჭირდებათ. საბაზისო ბილეთში შედის ე.წ. ონლაინ-ჩექინი და ერთი უფასო ზურგჩანთა.
არ დაგავიწყდეთ ონლაინ-ჩექინი. ბილეთის დაჯავშნისას გაიარეთ ეს პროცედურა, ვებ-ჩექინისას მიიღებთ ბარათს, ამობეჭდეთ და წარადგინეთ აეროპორტში რეგისტრაციის დროს. წინააღმდეგ შემთხვევაში აეროპორტში ამ მომსახურებისთვის დამატებით თანხას გადაგახდევინებენ.
საბაზისო ბილეთის შეძენის შემთხვევაში სისტემა თავად ირჩევს თქვენი ლოკაციის ადგილს და სავარძელი შეიძლება შეგხვდეთ როგორც თვითმფრინავის წინა, ასევე უკანა ნაწილში. თუმცა, რამდენიმე ევროს დამატების შემთხვევაში, სასურველი ადგილის შერჩევაც შეგიძლიათ.
დაჯავშნეთ სასტუმრო/ჰოსტელი/ბინა: მცირებიუჯეტიანი მოგზაურობისას შედარებით იაფფასიანი სასტუმროს შერჩევაც დაგჭირდებათ. სასტუმროების მოძებნაში დაგეხმარებათ საუკეთესო ვარიანტების მაძიებელი საიტები hotelscombined.com ან booking.com, სადაც დაახლოებით 100 ლარის ფარგლებში შეგიძლიათ ორ ადამიანზე დაიქირაოთ ნომერი აბაზანით, კონდიციონერით და უფასო wi-fi-ით.
თუ ლარნაკაში დაბინავების კიდევ უფრო იაფი ვარიანტი გინდათ, მაშინ აპარტამენტები გადაათვალიერეთ. ესაა ჩვეულებრივი ბინა, ან ოთახი ბინაში, სასტუმროს მსგავსი მომსახურებით. ასეთი ადგილი შეგიძლიათ airbnb.com-ზე მოძებნოთ, სადაც ორადგილიანი საძინებლის იზოლირებული აბაზანით დაქირავებას ერთ ღამეში $25-ის ფარგლებში შეძლებთ.
გაითვალისწინეთ: ბინის შერჩევისას დააკვირდით ვარსკვლავების რაოდენობას. ისინი ასახავენ ბინის პირობებს, მის სისუფთავეს, მფლობელის კომუნიკაბელობას, მის სანდოობას.
აიღეთ სამოგზაურო დაზღვევა: ერთჯერადი, სტანდარტული სამოგზაურო დაზღვევა დღეში 1 ლარიდან დაგიჯდებათ. სამოგზაურო დაზღვევის შეძენა სადაზღვევო კომპანიების სერვის–ცენტრებში შეგიძლიათ, აგრეთვე ინტერნეტითაც, სახლიდან გაუსვლელად.
ფასები ლარნაკაში:
ტრანსპორტირება — ძირითად შემთხვევაში, ყველაზე იაფი გადაადგილება ავტობუსითაა შესაძლებელი.
ლარნაკა–ნიქოზია — 4€
ლარნაკა–აია-ნაპა — 4 €
ლარნაკა–ლიმასოლი — 4 €
ლარნაკაში შიდა მგზავრობა:
› ერთჯერადი გადაადილება ავტობუსით — 1,5 €
› ღამე 21:00-დან 4:00 სთ-მდე — 2.50 €
› ერთდღიანი მრავალჯერადი ბილეთი — 5 €
› ტაქსი 1 კმ — 0.73 €, 1 სთ – 14.33 €
გაითვალისწინეთ: თუ რამდენიმე ქალაქის მონახულება გადაწყვიტეთ, იმგზავრეთ ღამით, გამოიძინეთ ავტობუსში, ამით სასტუმროს ფულსაც დაზოგავთ, მგზავრობაც შედარებით იაფი დაჯდება და დროსაც მოიგებთ.
თუ დიდ ქალაქში ჩადიხართ, იყიდეთ მთელი დღის ბილეთი – ეს ბევრად იაფი დაგიჯდებათ და მერე, თუ გინდათ, მთელი დღე არ ჩამოხვიდეთ საზოგადოებრივი ტრანსპორტიდან.
კვება – ფასები 2017 წლის აპრილის მონაცემებით: ახალი თეთრი პური (0.5 კგ) — 1.32€, ადგილობრივი ყველი (1კგ) – 5.47€, ქათმის ფილე (1კგ) – 5.47€, ძროხის ხორცი (1 კგ) – 8.16€, ვაშლი (1კგ) – 1.86€, ბანანი (1კგ) – 1.08€, პომიდორი (1კგ) – 1.2€, კარტოფილი (1კგ) — 0.75€, რძე (1ლ) – 1.4€, კვერცხი (12ცალი) – 2.37€, ბრინჯი (1კგ) – 1.67€, კომბოსტო (1 თავი) — 0.31€, წყალი (1.5ლ) – 0.68€, კაპუჩინო — 3.16€.
იაფფასიან რესტორანში სადილობა დაახლოებით 10 ევრო დაგიჯდებათ.
ლარნაკაში უამრავ საჩუქრის მაღაზიასაც გადააწყდებით, სადაც 5€-დან შეიძენთ ლამაზ სუვენირებს.
იმოგზაურეთ, მიიღეთ ახალი გამოცდილებები. ახალი გამოცდილება კი ყველაზე შეუფასებელი რამაა, რასაც მოგზაურობისგან უფასოდ იღებთ.
და ბოლო რჩევა ალბერ კამიუსგან: ქალაქის გასაცნობად საჭიროა სცადო, გაიგო, თუ როგორ შრომობენ აქ, როგორ უყვართ და როგორ კვდებიან.
ხატია გიგოლაშვილი