ჯერ მხოლოდ დილის 9 საათია, თქვენ კი ფეხზე ძლივს დგახართ. საინტერესოა, რამდენი ფინჯანი ყავის დალევა მოასწარით?
ღამე როგორ გაატარეთ? ყველა თქვენი ფრენდი ჩაქრა Facebook-ში, თქვენი პროფილი კი ისევ ანთებული იყო...
ვერ დამაჯერებთ, რომ გიჟური ღამე გქონდათ.
ან კიდევ ცხვრების თვლა არ მოგბეზრდათ? 20, 40, 120, 220... დააძინეთ და დაასვენეთ, პატივცემულო, ეს ცხვრები.
მაინც მინდა გითხრათ, რომ თქვენ მარტო არ ხართ. ძილის დარღვევა თანამედროვეობის ერთ-ერთი აქტუალური პრობლემაა. მსოფლიოში მილიონობით ადამიანი მიმართავს სამედიცინო დაწესებულებებს ძილთან დაკავშირებული ჩივილით.
ძილის ხანგრძლივობა ინდივიდუალურია, ზოგიერთისთვის ოთხსაათიანი ძილი სავსებით საკმარისია, ზოგს კი ენერგიის აღსადგენად ცხრასაათიანი ძილი სჭირდება. ძილის საჭიროება ასაკის მიხედვით იცვლება და დაახლოებით 60 წლის შემდეგ მასზე მოთხოვნა თანდათანობით იკლებს.
ძილის ჰიგიენაზე რას იტყვით?
საწოლი გამოიყენეთ მხოლოდ ძილისა და სექსისთვის. ნუ გამოიყენებთ ლოგინს კვებისთვის, ტელევიზორის ყურებისთვის, კითხვისთვის და ა.შ. დაწექით და ადექით ერთსა და იმავე დროს.
დაძინების წინ გაანიავეთ საძინებელი, მაქსიმალურად შემცირეთ ხმაურის და შუქის შეღწევის შესაძლებლობა საძინებელში.
- მოერიდეთ ლურჯი ნათების მქონე მოწყობილობებს – ტელევიზორი, კომპიუტერი, ტელეფონი... აღნიშნული ხელს უწყობს ძილის ჰორმონის მელატონინის რაოდენობის შემცირებას, ამცირებს დროული ჩაძინების შანსს და იწვევს გამოღვიძებას.
- შეეცადეთ შეწყვიტოთ ფიზიკური დატვირთვა დაძინებამდე ოთხი საათით ადრე.
- არ ივახშმოთ გვიან, საკვებისა და წყლის მიღება უნდა შეწყდეს დაძინებამდე მინიმუმ 2-3 საათით ადრე.
- მოერიდეთ ალკოჰოლის და თამბაქოს მიღებას ძილის წინ, აღნიშნული იწვევს ზედაპირულ ძილს.
- თავი აარიდეთ დღის განმავლობაში თვლემას, მაშინაც კი, როდესაც ძალიან დაღლილი ხართ, რადგან ყოველი საათი, რომელიც დღის განმავლობაში გეძინათ, აკლდება თქვენ ღამის ძილს და არღვევს თქვენ ნორმალურ, ბიოლოგიური ძილ-ღვიძილის რიტმს.
ექიმის დანიშნულების გარეშე საძილე პრეპარატების გამოყენებას ჯობს ისევ ცხვრები ითვალოთ.
- შექმენით ძილის რიტუალი – მოემზადეთ ძილისთვის, შეამცირეთ გონებრივი და ფიზიკური აქტივობა, მოდუნდით, რელაქსაციისთვის შეიძლება გამოიყენოთ სასიამოვნო მუსიკა და სუნთქვითი ვარჯიშები.
თქვენი უშფოთველი ძილისთვის ხალხური მეთოდიც მზად გვაქვს:
ხალხურ მედიცინას არ მოეპოვება უკეთესი საშუალება უძილობის წინააღმდეგ, ვიდრე 2 ჩაის კოვზი თაფლი, რომელსაც დამატებული აქვს 2 ჩაის კოვზი ვაშლის ძმარი. მიიღეთ დღეში სამჯერ.
კარგია რძე და უკეთესია 1 ჭიქა კატაბალახას ძირების ცხელი ნაყენი (1 ჩაის კოვზი 1 ჭიქა მდუღარე წყალში 20 წუთი გააჩერეთ). შეიძლება ამოიდოთ ბალიშის ქვეშ ერთი მუჭა სვია. საკმაო რაოდენობით ხახვის მიღება ღამით ასევე იძლევა ღრმა ძილის საშუალებას.
და თუ ვერც ძილის ჰიგიენა და ვერც ხალხური მეთოდი ვერ დაგეხმარათ, რა თქმა უნდა, აუცილებელია მიმართოთ სპეციალისტს - სომნოლოგს, რათა მოხდეს თქვენი პრობლემის სრულყოფილი შესწავლა-გამოკვლევა და მკურნალობის სწორი ტაქტიკის განსაზღვრა. დროული დიაგნოსტიკისა და სწორი მკურნალობის შემთხვევაში შესაძლებელია პრობლემის სრული კონტროლი და, გარკვეულ შემთხვევებში, სრული განკურნებაც.
ძილი ნებისა!
