თბილისი, 9 აპრილი – Sputnk. საქართველოსა და რუსეთის ნაკრებების მატჩი რაგბიში ევროპის ერთა თასის გათამაშების ფარგლებში კვლავ გაურკვეველი დროით გადაიდო, ნათქვამია ევროპის რაგბის ვებ–გვერდზე გამოქვეყნებულ განცხადებაში.
ეს გადაწყვეტილება Rugby Europe-ის დირექტორთა საბჭომ ევროპის ასოციაციების წარმომადგენლებთან ვიდეოკონფერენციის შემდეგ მიიღო.
განცხადებაში აღნიშნულია, რომ ევროპის თასის ამჟამინდელი გათამაშების სამივე დარჩენილი მატჩი (საქართველო–რუსეთი, ესპანეთი–პორტუგალია, რუმინეთი–ბელგია) აუცილებლად გაიმართება, მაგრამ მოგვიანებით, როდესაც მსოფლიოში ახალი კორონავირუსის პანდემიასთან დაკავშირებული ვითარება გაუმჯობესდება და ნაკრებები ამ მატჩების ჩასატარებლად მზად იქნებიან.
Rugby Europe-ის დირექტორთა საბჭომ ასევე მიიღო გადაწყვეტილება, გაუქმდეს ევროპის ჩემპიონატი U-18 და U-20 ასაკობრივ კატეგორიებში, რომლებიც წელს კალინინგრადსა (რუსეთი) და კიომბრაში (პორტუგალია) უნდა გამართულიყო.
საქართველო–რუსეთის მატჩი თბილისში 14 მარტს უნდა გამართულიყო. სატურნირო თვალსაზრისით ქართული გუნდისთვის ამ შეხვედრას არანაირი მნიშვნელობა არ აქვს, რადგან ის ტურნირის გამარჯვებული ვადამდე გახდა.
