თბილისი, 22 აგვისტო — Sputnik. საქართველოს ნაკრების კაპიტანი და NBA-ს კლუბ "გოლდენ სტეიტ უორიორზის" ცენტრი ზაზა ფაჩულია ევრობასკეტ-2017-ის მოსამზადებელ ტურნირში "აკროპოლისის თასი" მონაწილეობას არ მიიღებს. ტურნირი საბერძნეთში 23 აგვისტოს იწყება.
ფაჩულიამ ერთ-ერთ ვარჯიშზე მცირე ტრავმა მიიღო. სამედიცინო გამოკვლევამ აჩვენა, რომ დაზიანება სერიოზული არ არის, მაგრამ კალათბურთელს ერთკვირიანი რეაბილიტაციის კურსის გავლა მოუწევს.
ტრავმის მიუხედავად, ფაჩულია ნაკრებთან ერთად საბერძნეთში გაემგზავრა. იქ გუნდი მონაწილეობას მიიღებს საერთაშორისო ტურნირში "აკროპოლისის თასი".
ილია ზუროსის გუნდი 23 აგვისტოს ტურნირის მასპინძლების წინააღმდეგ ითამაშებს, 24 აგვისტოს კი სერბეთის ნაკრებს შეხვდება. დასკვნით მატჩს ქართველი კალათბურთელები იტალიის წინააღმდეგ 25 აგვისტოს გამართავენ.
ტურნირის დასრულების შემდეგ საქართველოს ნაკრები ისრაელში გაემგზავრება, სადაც მზადებას ევრობასკეტ-2017-ისთვის გააგრძელებს.
ევრობასკეტი-2017 გაიმართება 31 აგვისტოდან 17 სექტემბრის ჩათვლით პერიოდში ოთხ ქვეყანაში: ფინეთში, თურქეთში, ისრაელსა და რუმინეთში.
საქართველოს ნაკრები В-ჯგუფში გამოვა უკრაინის, ისრაელის, ლიტვის, იტალიისა და გერმანიის გუნდებთან ერთად. ამ ჯგუფის მატჩები თელ-ავივში გაიმართება.