თბილისი, 22 აგვისტო — Sputnik. ქართველმა ბერძნულ-რომაული სტილით მოჭიდავეებმა რობერტ ქობლიაშვილმა (-85 კგ) და რევაზ ნადარეიშვილმა (-98 კგ) ბრინჯაოს მედლები მოიპოვეს მსოფლიო ჩემპიონატზე, რომელიც პარიზში დაიწყო.
ქობლიაშვილმა ¼ ფინალში თურქ მეტეჰან ბასარუსთან წააგო, მაგრამ რადგან თურქი მოჭიდავე ფინალში გავიდა და შემდეგ მსოფლიო ჩემპიონი გახდა, ქართველმა სპორტსმენმა რეპეშაჟში გამოსვლის უფლება მიიღო, სადაც ბულგარელ ნიკოლაი ბაირიაკოვს შეხვდა და 2:1 დაამარცხა.
ანალოგიური სცენარით განვითარდა მოვლენები ნადარეიშვილის შემთხვევაშიც, რომელმაც ¼ ფინალში არტურ ალექსანიანთან წააგო სომხეთიდან.
რეპეშაჟში ქართველმა მოჭიდავემ, მიუხედავად სერიოზული ტრავმისა, ირანელი სეიდმუსტაფა სალეჰიდზადე დაამარცხა, ხოლო მესამე ადგილისთვის ბრძოლაში — უზბეკი რუსტამ ასაკალოვი.
22 აგვისტოს ბერძნულ-რომაული სტილით მოჭიდავეებს შორის გათამაშდება მედლები ოთხ — 59, 66, 80 და 130 კილოგრამამდე წონით კატეგორიაში.
საქართველოს ნაკრებს წარმოადგენენ ლაშა მარიამიძე (-59 კგ), გოგა გოგიბერაშვილი (-66), ზურაბ დათუნაშვილი (-80) და ლევან არაბული (-130).
