21:39 19 ნოემბერი 2017
პირდაპირი ეთერი
ზაზა ფაჩულია

ფაჩულია საქართველოს ღირსების ორდენით დაჯილდოვდა

© AP Photo/ Marcio Jose Sanchez
სპორტი
მოკლე ბმულის მიღება
2401

საქართველოს პრეზიდენტის ადმინისტრაციის უფროსი ფაჩულიას ტელეფონით დაუკავშირდა და სახელმწიფოს მეთაურის სახელით მას NBA-ს ჩემპიონობა მიულოცა.

თბილისი, 17 ივლისი — Sputnik. საქართველოს კალათბურთის ნაკრების კაპიტანი და NBA-ს კლუბ "გოლდენ სტეიტ უორიორზის" ცენტრი ზაზა ფაჩულია დაჯილდოვდება ღირსების ორდენით, ნათქვამია საქართველოს პრეზიდენტის გიორგი მარგველაშვილის Facebook-ის ოფიციალურ გვერდზე განთავსებულ განცხადებაში.

საქართველოს პრეზიდენტის გადაწყვეტილებით, ქვეყნის სახელის საერთაშორისო ასპარეზზე გატანისა და საქართველოს პოპულარიზაციისათვის ზაზა ფაჩულია ღირსების ორდენით დაჯილდოვდება.

პრეზიდენტის ადმინისტრაციის უფროსი გიორგი აბაშიშვილი ზაზა ფაჩულიას დაუკავშირდა, NBA-ს ჩემპიონობა მიულოცა და პრეზიდენტის სახელით შემდგომი წარმატებები უსურვა.

ზაზა ფაჩულიამ, თავის მხრივ, მადლობა გადაუხადა პრეზიდენტს და აღნიშნა, რომ ამ სახელმწიფო ჯილდოს მიღება მისთვის დიდი პატივია.

ღირსების ორდენი — საქართველოს სახელმწიფო ჯილდოა, რომელიც 1992 წლის დეკემბერში დაწესდა და გადაეცემა სახელმწიფო და საზოგადოებრივი მოღვაწეობის სხვადასხვა სფეროში შეტანილი წვლილისთვის.

მანამდე ზაზა ფაჩულიას ქართული სპორტის პოპულარიზაციისთვის სპეციალური ჯილდო გადაეცა. მას გადაეცა მოოქროვილი ფირფიტა, რომელიც ანტიკური ხანის ქართული საოქრომჭედლო ოსტატობის ერთ-ერთი ექსპონატის ასლს წარმოადგენს.

ამ სეზონზე ფაჩულია "გოლდენ სტეიტ უორიორზის" შემადგენლობაში NBA-ს ჩემპიონი გახდა და ის ქართული კალათბურთის ისტორიაში პირველი სპორტსმენია, რომელმაც ამერიკის ნაციონალური კალათბურთის ასოციაციის ჩემპიონის ტიტული მოიპოვა.

ფაჩულია სექტემბერში საქართველოს ნაკრების შემადგენლობაში კალათბურთის ევროპის ჩემპიონატში მიიღებს მონაწილეობას.

მთავარი თემები