თბილისი, 17 მაისი — Sputnik. მსოფლიო ბუკმეკერული კანტორების აზრით, საქართველოს ფეხბურთის ნაკრები 2018 წლის მსოფლიო ჩემპიონატის შესარჩევ გასვლით მატჩში მოლდოვის წინააღმდეგ ფავორიტია.
ვლადიმირ ვაისის აღსაზრდელთა მოგებაზე შეთავაზებული კოეფიციენტი საშუალოდ 2,4-დან 2,55-მდე მერყეობს. იმავე დროს მოლდოვის მოგებას ბუკმეკერები 2,7 – 2,95 კოეფიციენტით აფასებენ.
2018 წლის მსოფლიო ჩემპიონატის შესარჩევ ციკლში საქართველოსა და მოლდოვის ნაკრებები ადრე უკვე შეხვდნენ. მატჩი გასული წლის 12 ნოემბერს თბილისში გაიმართა და მოულოდნელად ფრედ დასრულდა ანგარიშით 1:1.
სულ გუნდებმა ერთმანეთში 10 მატჩი ჩაატარეს, აქედან სამჯერ საქართველომ მოიგო, ოთხჯერ მოლდოვამ და ოთხჯერ ფრე დაფიქსირდა. ამ 10 შეხვედრიდან ხუთი ამხანაგური იყო.
შესარჩევ D ჯგუფში ხუთი ჩატარებული ტურის შემდეგ საქართველოს ნაკრებმა ორი ქულა მოიპოვა და ჯგუფში მეხუთე ადგილს იკავებს. მოლდოვას ერთი ქულით ნაკლები აქვს და ის სატურნირო ცხრილში ბოლო, მეექვსე ადგილზეა.
მოლდოვისა და საქართველოს ნაკრებებს შორის მატჩი 11 ივნისს კიშინიოვის „ზიმბრუს“ სტადიონზე გაიმართება.
