თბილისი, 18 მაისი — Sputnik. საქართველოს პრეზიდენტი გიორგი მარგველაშვილი ფეხბურთში საქართველოს თასის ფინალს დაესწრება, იუწყება ფეხბურთის ფედერაციის ოფიციალური ვებგვერვდი.
ფინალური შეხვედრა დღეს 19:00 საათზე დაიწყება. დავით ყიფიანის სახელობის თასის მოსაპოვებლად ერთმანეთს თბილისის „დინამო“ და ბოლნისის „სიონი“ დაუპირისპირდებიან. მატჩი პირველად გაიმართება რამაზ შენგელიას სახელობის ქუთაისის სტადიონზე.
გამარჯვების შემთხვევაში „დინამო“ მეცამეტედ გახდება თასის მფლობელი და მეათედ გააფორმებს დუბლს.
რაც შეეხება „სიონს“, გუნდი არასდროს ყოფილა თასის მფლობელი. ბოლნისელმა ფეხბურთელებმა მხოლოდ ერთხელ, 2003 წელს მიაღწიეს ფინალამდე, თუმცა გადამწყვეტ თამაშში თბილისის „დინამოსთან“ ანგარიშით 1:3 დამარცხდნენ.
მიიღეთ მონაწილეობა Sputnik-ის გამოკითხვაში და ხმა მიეცით თქვენს ფავორიტ ლეგიონერს >>