04:53 28 ივლისი 2021
პირდაპირი ეთერი
  • EUR3.6409
  • 100 RUB4.1895
  • USD3.0892
საზოგადოება
მოკლე ბმულის მიღება
119 0 0

გერმანიაში სამუშაოდ წასული მოქალაქეების ნაწილი მაისის შუა რიცხვებში ქართულ მედიას დაუკავშირდა. მათ განაცხადეს, რომ გაუსაძლისი სოციალური და შრომის პირობები აქვთ და დახმარება ითხოვეს.

თბილისი, 19 ივნისი — Sputnik. საქართველოს ის მოქალაქეები, რომლებიც გერმანიაში სეზონური დასაქმების პროგრამაში მონაწილეობენ და რომელთა დამსაქმებელმაც დაარღვია პროგრამით გათვალისწინებული პირობები,  ახალ საცხოვრებელში გადაიყვანეს, იუწყება „პირველი არხი“.

დასაქმების მსურველთა პირველი ნაკადი გერმანიაში აპრილის შუა რიცხვებში გაემგზავრა. მაგრამ ერთი თვის შემდეგ გაერთიანებულმა პროფკავშირებმა განაცხადეს, რომ საქართველოს მოქალაქეების უფლებები ირღვევა და მათ ცხოვრება და მუშაობა გაუსაძლის პირობებში უწევთ.

ტელეკომპანია ავრცელებს ვიდეო- და ფოტომასალას, სადაც ჩანს, რომ ამიერიდან საქართველოს მოქალაქეების ჯგუფი ახალ, ორადგილიან კონტეინერებში იცხოვრებს. ყოველ კონტეინერში არის ორი საწოლი, კარადა, მაგიდა, ორი სკამი, გაზქურა, ონკანი, მაცივარი, გამოსაცხობი ღუმელი. ცალკე გათვალისწინებულია საპირფარეშოები და აბანოები, სადაც ხუთი სველი წერტილია.

საქართველოს დასაქმების ხელშეწყობის სააგენტოსა და გერმანიის დასაქმების ფედერალურ სააგენტოს (BA) შორის 2020 წლის 17 იანვარს დაიდო შეთანხმება „გერმანიის ფედერაციულ რესპუბლიკაში სეზონურ სამუშაოზე ქართული სამუშაო ძალის დასაქმების შესახებ", რითიც საფუძველი ჩაეყარა გერმანიაში საქართველოს მოქალაქეების ლეგალური დასაქმების პროექტს. საუბარია ერთიდან სამ თვემდე პერიოდში სოფლის მეურნეობაში სხვადასხვა სეზონურ სამუშაოზე. სამუშაო პერიოდი კვირაში 5-6 დღეა, დრო კი 8–10 საათი დღეში. მინიმალური ხელფასი ერთ საათში 9,5 ევროა, რომელსაც გამოაკლდება გადასახადების, კვებისა და საცხოვრებლის ხარჯები.

კონტრაქტის მიხედვით, დასაქმებული მოქალაქეების საცხოვრებელი სამუშაო ადგილთან ახლოს უნდა იყოს და მისი ღირებულება არ უნდა აღემატებოდეს დღეში 6–15 ევროს. ჯანმრთელობის დაზღვევას გერმანელი დამსაქმებლები უზრუნველყოფენ – იქნება ეს ტრავმა, კორონავირუსი თუ სხვა შემთხვევა.

გერმანიაში სამუშაოდ წასული მოქალაქეების ნაწილი მაისის შუა რიცხვებში ქართულ მედიას დაუკავშირდა. მათ განაცხადეს, რომ გაუსაძლისი სოციალური და შრომის პირობები აქვთ და დახმარება ითხოვეს. ერთი კვირის შემდეგ გერმანიის შრომისა და სოციალური საკითხების ფედერალურ სამინისტროში პირობა დადეს, რომ გერმანიაში სეზონურ სამუშაოებზე დასაქმებული საქართველოს მოქალაქეების სამუშაო პირობები დაუყოვნებლივ გამოსწორდება არსებული სტანდარტების შესაბამისად.

მაგრამ გასული კვირის ბოლოს მედიაში კვლავ გავრცელდა საქართველოს მოქალაქეების ვიდეო- და აუდიოჩანაწერები, სადაც ისინი აცხადებენ, რომ შრომის პირობები ოდნავაც არ გამოსწორებულა, საყოფაცხოვრებო პირობები კვლავ მძიმეა, ხოლო ხელფასი დაპირებულზე დაბალია.

მთავარი თემები