თბილისი, 14 ივნისი – Sputnik. იდეების კონკურსი GreenOvation-ის საფინალო ეტაპი დღეს გაიმართება, იუწყება გარემოს დაცვისა და სოფლის მეურნეობის სამინისტრო.
14 ივნისს სასტუმრო Rooms Tbilisi-ის საკონფერენციო დარბაზში ონლაინ-კონფერენციის ფორმატში კონკურსის დასკვნითი ეტაპი ჩატარდება.
რეგლამენტის თანახმად, დარბაზში მხოლოდ ჟიურის წევრები შეიკრიბებიან, კონკურსის ექვსი ფინალისტი კი ონლაინ-ფორმატში წარადგენს საკუთარ პროექტს და უპასუხებს ჟიურის კითხვებს. ონლაინ-კონფერენციის დასრულების შემდეგ კონკურსის ჟიური სამ გამარჯვებულს გამოავლენს.
კონკურსის შედეგები ფინალისტებისთვის 15 ივნისს გახდება ცნობილი. თითოეული გამარჯვებული წარდგენილი პროექტისთვის 10 ათასი ევროს ფარგლებში გრანტს მიღებს.
რეგიონული კონკურსი GreenOvation-ის ფინალური ღონისძიება საქართველოსა და აზერბაიჯანში 14 ივნისს, სომხეთში კი 23 ივნისს ჩატარდება.
კონკურსის პირდაპირი ტრანსლაციის ნახვა GreenOvation-ის Facebook-გვერდზე იქნება შესაძლებელი.
