თბილისი, 24 აპრილი – Sputnik. სამეგრელო-ზემო სვანეთში კორონავირუსი კიდევ 115 პირს დაუდასტურდა, რეგიონში COVID-19-ით გამოწვეული გართულების შედეგად 2 ადამიანი გარდაიცვალა.
ინფიცირებულთა შემთხვევების რაოდენობით სამეგრელო–ზემო სვანეთი დღეისათვის თბილისის შემდეგ მეორე ადგილს იკავებს.
ბოლო მონაცემებით, სამეგრელო-ზემო სვანეთის კოვიდმიმღებ კლინიკებში კი 276 ადამიანი მკურნალობს, მძიმე მდგომარეობაში მყოფი პაციენტების რაოდენობა კი 26-მდე გაიზარდა.
სამხარეო ადმინისტრაციის ინფორმაციით, რუხის კლინიკაში მკურნალობის კურსს 159 კოვიდპაციენტი გადის, მათ შორის, მძიმეა 23 პირის ჯანმრთელობის მდგომარეობა.
ფოთის ჰოსპიტალში 40 კოვიდინფიცირებული რჩება, მათ შორის 3 მძიმედაა.
აბაშის „ევექსის" კოვიდკლინიკაში 27 პაციენტია მოთავსებული, ხოლო სენაკის „ლაზიკა მედში" 50 პირი მკურნალობს.
რეგიონის მასშტაბით კორონავირუსისგან კიდევ 42 ადამიანი გამოჯანმრთელდა.
საკარანტინო სივრცეში 9 მოქალაქე რჩება.
საქართველოს მასშტაბით ბოლო 24 საათში კორონავირუსის 1.250 შემთხვევა გამოვლინდა და ახალი კორონავირუსით ინფიცირებულთა საერთო რიცხვმა 302.785-ს მიაღწია.
საქართველოში კორონავირუსის პირველი შემთხვევა გასული წლის 26 თებერვალს დაფიქსირდა.
ნიკა ლატარია