თბილისი, 10 აპრილი – Sputnik. გორში, გიორგი აბრამიშვილის სახელობის თავდაცვის სამინისტროს სამხედრო ჰოსპიტალში სამხედრო მოსამსახურეების კორონავირუსის საწინააღმდეგო AstraZeneca-ს პრეპარატით ვაქცინაციის პროცესი დაიწყო, იუწყება თავდაცვის სამინისტრო.
გავრცელებული ინფორმაციით, პირველ ეტაპზე თავდაცვის ძალების ის კონტინგენტი იცრება, რომელიც „მტკიცე მხარდაჭერის მისიის“ შესასრულებლად ავღანეთში წასასვლელად ემზადება.
მეორე ქვეითი ბრიგადის 23-ე ბატალიონის სამხედრო მოსამსახურეების ვაქცინაცია რამდენიმე დღის განმავლობაში ეტაპობრივად ჩატარდება.
სამხედრო ჰოსპიტალში ვაქცინაციის პროცესი შესაბამისი წესების დაცვით მიმდინარეობს, აღნიშნავენ თავდაცვის სამინისტროში.
8 აპრილს საქართველოს ჯანდაცვის მინისტრის მოადგილე თამარ გაბუნიამ განაცხადა, რომ საქართველოში AstraZeneca-ს ვაქცინის გამოყენება 55 წელს გადაცილებულ პირებში გაგრძელდება. როგორც გაბუნიამ განაცხადა, აღნიშნული გადაწყვეტილება საქართველოში ექსპერტების საბჭომ სამინისტროსა და დაავადებათა კონტროლის ცენტრის თანამშრომლებთან ერთად არის მიღებული და „ასაკობრივი ჯგუფის მიხედვით შემდგომი გაფართოება ამ ეტაპზე AstraZeneca-სთვის აღარ მოხდება“.
საქართველოში 15 მარტიდან კორონავირუსის საწინააღმდეგო ვაქცინაციის პირველი ეტაპი AstraZeneca-ს ვაქცინით დაიწყო. ამ ეტაპზე იმუნიზაცია AstraZeneca-ს და Pfizer-ის ვაქცინებით ხორციელდება. ხოლო ჩინური ვაქცინა Sinopharm-ის გამოყენება, რომლის 100 ათასი დოზა საქართველოში 3 აპრილს ჩამოვიდა, სავარაუდოდ, 20 აპრილიდან დაიწყება.
