თბილისი, 2 იანვარი – Sputnik. ახალი წლის ღამეს, სამშენებლო კომპანია m²-მა ტაბატაძეების მრავალშვილიან ოჯახს ბინა გადასცა, იუწყება ტელეკომპანია „იმედი“.
შალვა ტაბატაძის ოჯახს, რომელიც მეათე შვილს ელოდება, კომპანიამ ჭყონდიდელის ქუჩაზე მდებარე მშენებარე კორპუსში 130 კვადრატული მეტრის ფართის ბინა გამოუყო.
„37 წლის ვარ და მეათე შვილს ველოდები. ორ–ორი წელია ბავშვებს შორის ასაკში სხვაობა. ჩემი მუღლე ჩემს ყველა მშობიარობას ესწრებოდა“, — ამბობს ქეთევან ტაბატაძე.
მშობლებს შვიდი ბიჭი და ორი გოგო ჰყავთ. მეათე შვილსაც გოგონას ელოდებიან, რომელსაც ანას დაარქმევენ.
როგორც შალვა ტაბატაძემ მანამდე აღნიშნა, ოჯახის მთავარი პრობლემა საცხოვრებელი ფართი იყო, ამიტომ კომპანიამ ეს პრობლემა მოუგვარა და საჩუქრად სწორედ ბინა გადასცა.
