ავთანდილ ცქვიტინიძეს მეუღლესთან ხშირად „აშორებდნენ”, თუმცა, როგორც დიზაინერმა თქვა, ასეთი ჭორების შემდეგ მის სიყვარულს უფრო მეტად უფრთხილდებოდა. ავთანდილმა ლელა წურწუმიას გადაცემაში მისი და მისი დიპლომატი მეუღლის ხათუნა თორთლაძის სიყვარულზე ისაუბრა. დიზაინერმა გაიხსენა, რომ ხათუნა მასთან პირველად მაშინ მივიდა, როცა ავთანდილი უკვე წარმატებული იყო და მასთან მოხვედრა რთული იყო.
დიზაინერის თქმით, ხათუნა სწორედ იმ ქალს ჰგავს, ვისაც ბავშვობიდან ხატავდა – გოგონებს, რომლებსაც ჰქონდათ აქაჩული წარბები და ხვეული თმა. და როდესაც პირველად დაინახა მომავალი მეუღლე, მიხვდა, რომ ის გოგონა იპოვა, რომელსაც მთელი ცხოვრება ხატავდა.
ავთანდილის მეუღლე ბიზნესმენ ბადრი პატარკაციშვილის დისშვილია. შესაბამისად, დიზაინერის და ოლიგარქის ოჯახის წევრის დაქორწინებას მაშინ დიდი მითქმა-მოთქმა მოჰყვა.
„ვიცოდი ამას რაც მოჰყვებოდა, საზოგადოების თვალწინ გაზრდილი პატარა, უპატრონო ბიჭი უცებ გახდა ოლიგარქის სიძე. როცა მიყვარს ადამიანი, შემიძლია პედესტალზე დავაყენო. იმაზე მეტს ვაკეთებდი მისთვის, ვიდრე წარმომედგინა. გაღმერთებული მქონდა ეს ისტორია“, – გაიხსენა ავთანდილმა.
წყვილს 15 წლის ანასტასია ცქვიტინიძე ჰყავს, რომელიც ტყუპისცალივით ჰგავს დედას.
