თბილისი, 27 ოქტომბერი – Sputnik. აშშ-ის ჯონს ჰოპკინსის უნივერსიტეტის ქართველი დოქტორი, ექიმი-ინფექციონისტი მამუკა მაჩაიძე „ფეისბუქის“ პირად გვერდზე აქვეყნებს რეკომენდაციებს იმ შემთხვევისთვის, თუ კორონავირუსი დაგიდასტურდებათ და მკურნალობა სახლის პირობებში მოგიწევთ.
ექიმის თქმით, აუცილებელია კოვიდ-ინფიცირებულმა მიიღოს რაც შეიძლება მეტი სითხე (გულის უკმარისობა არის ერთ-ერთი გამონაკლისი, როდესაც ფრთხილად უნდა ვიყოთ სითხეების მიღებისას), არ დალიოს სიცხის დამწევი თუ ტემპერატურა არის 38.3°-ზე დაბალი, იმოძრაოს რაც შეიძლება მეტი – „ოთახში იარეთ, ბუქნები აკეთეთ, ყველაფერი, რაც ფეხის კუნთებს აამუშავებს“, არ დალიოს ასპირინი (ან ნებისმიერი „სისხლის გამათხელებელი“) თვითნებურად, თუ უკვე გამოწერილი არ აქვს ექიმის მიერ.
სუნთქვის გართულების, გულ-მკერდის გახანგრძლივებული ტკივილის/მოჭერის შეგრძნების, გონების დაბინდვის, სახის, ან ტუჩების გალურჯების შემთხვევაში აუცილებელია „112“-ში დარეკვა.
„თუ თქენ ხართ კოვიდ-დადასტურებული, ან საეჭვო პაციენტის მომვლელი: გაიკეთეთ ნიღაბი პაციენტთან კონტაქტისას, ხშირად დაიბანეთ ხელები; თუ არის საშუალება, სასურველია პაციენტს ჰქონდეს გამოყოფილი ოთახი, სააბაზანო, თეთრეული და ჭურჭელი, რომელიც ცალკე გაირეცხება და ზედაპირები გასუფთავდება სადეზინფექციო საშუალებით, რეზინის ხელთათმანის გამოყენებით; ბუნებრივია, მნახველის ვიზიტი ამ დროს არ უნდა მოხდეს“, – წერს მამუკა მაჩაიძე.
ამ დროისათვის საქართველოში სულ კორონავირუსის 30303 დადასტურებული შემთხვევაა, გამოჯანმრთელდა 11370 ადამიანი, გარდაიცვალა – 215, კარანტინის რეჟიმშია 3769, სტაციონარებში ექიმების დაკვირვების ქვეშ 3832 პაციენტია, ხოლო კოვიდ–სასტუმროებში 2249 ადამიანი იმყოფება.
ქვეყანაში ინფიცირების პირველი შემთხვევა 26 თებერვალს დაფიქსირდა.
