თბილისი, 30 სექტემბერი — Sputnik. საქართველოს ყოფილი პრემიერ-მინისტრის ზურაბ ჟვანიას მეუღლე ნინო ქადაგიძე-ჟვანია სოციალურ ქსელში ფოტოს ავრცელებს და წერს, რომ მისი სახლი ხანძარს გადაურჩა.
გარდაცვლილი პოლიტიკოსის მეუღლე მეხანძრე-მაშველებს მადლობას უხდის, რადგან, მისი თქმით, რომ არა მათი ოპერატიულობა, უსახლკაროდ დარჩებოდა შვილებთან ერთად.
შინაგან საქმეთა სამინისტროს საზოგადოებრივი უსაფრთხოების მართვის ცენტრ 112-ში შესული ინფორმაციის თანახმად, თბილისში, გიორგი ახვლედიანის ქუჩაზე საცხოვრებელი სახლის პირველ სართულზე მდებარე რესტორნის სამზარეულოში ხანძარი 29 სექტემბერს, საღამოს საათებში გაჩნდა, შემდეგ კი შენობის მეორე სართულზე, საცხოვრებელ ბინაზე გავრცელდა.
„იყო ცეცხლის დიდ ფართობზე გავრცელების საფრთხეც, თუმცა მეხანძრე-მაშველებმა დროულად მოახერხეს ხანძრის ლოკალიზება და შემდეგ მისი სრული ლიკვიდირება“, – განაცხადეს უწყებაში.
შემთხვევის შედეგად არავინ დაშავებულა.
ადგილზე ცხრა სახანძრო-სამაშველო ჯგუფი მუშაობდა. მობილიზებული იყო ყველა შესაბამისი სამსახური.
