თბილისი, 28 სექტემბერი — Sputnik. ბოლო 24 საათში საქართველოში კორონავირუსის დიაგნოზით სამი პაციენტი გარდაიცვალა, იუწყება საზოგადოებრივი მაუწყებლის „პირველი არხი“.
65 და 70 წლის მამაკაცების გარდაცვალების ფაქტი ბათუმში დაფიქსირდა, მესამე პაციენტი კი – 57 წლის ქალი თბილისში დაიღუპა. გავრცელებული ინფორმაციით, სამივე პაციენტს თანმდევი დაავადებები აღენიშნებოდა.
ამ დროისათვის ქვეყანაში კორონავირუსის ინფექციით გარდაცვლილთა საერთო რაოდენობა 31 გახდა.
საქართველოში ახალი კორონავირუსით დაავადებულთა რაოდენობა ბოლო დღე-ღამეში 298-ით გაიზარდა და 5552-ს მიაღწია, გამოჯანმრთელდა 1906 ადამიანი, კარანტინის რეჟიმში იმყოფება 5637, სტაციონარებში ექიმების დაკვირვების ქვეშ 836 პაციენტია, ხოლო კოვიდ–სასტუმროებში 800 ადამიანი იმყოფება.
საქართველოში კორონავირუსის პირველი შემთხვევა 26 თებერვალს დაფიქსირდა.