თბილისი, 18 მაისი — Sputnik. საოპერო მომღერალი ნინო სურგულაძე სოციალურ ქსელში სამწუხარო ინფორმაციას აქვეყნებს.
როგორც მეცოსოპრანო წერს, 15 მაისს 48 წლის ასაკში მსოფლიო მნიშვნელობის კომპოზიტორი, იტალიელი დირიჟორი და პიანისტი ეციო ბოსსო გარდაიცვალა, რომელიც წლების განმავლობაში უმძიმეს სენს ებრძოდა.
თავად მსოფლიოში აღიარებული მეცოსოპრანოს ნინო სურგულაძის ცხოვრებაში არაჩვეულებრივი სიახლეა – ოპერის მომღერალი მალე დედა გახდება. ის ტყუპებს ელოდება. მას შემდეგ, რაც 2019 წლის დეკემბერში სურგულაძემ ახალი ამბავი ტელეკომპანია „მთავარის“ დილის გადაცემაში გაამჟღავნა, „ფეისბუქის“ საკუთარ გვერდზე გამოაქვეყნა საყვარელ მამაკაცთან ერთად გადაღებული ფოტოები. ოპერის მომღერლის რჩეული იურისტი გიორგი ინწკირველია. ის ცნობილი იურისტისა და მეცნიერის, თბილისის სახელმწიფო უნივერსიტეტის იურიდიული ფაკულტეტის დეკანის გივი ინწკირველის შვილიშვილია.
უცნობია, როდის დაიწყო წყვილის სიყვარულის ისტორია, თუმცა ახლა მათ ცხოვრებაში სასიხარულო სიახლეა და მალე ისინი მშობლები გახდებიან. ნინო სურგულაძის პოსტს „ფეისბუქზე“ უამრავი გამოხმაურება მოჰყვა. წყვილს ულოცავენ და ბედნიერებას უსურვებენ. ნინო სურგულაძე, წარმატებული კარიერის გარდა, ქველმოქმედებით არის დაკავებული. 42 წლის მეცოსოპრანოს საერთაშორისო საქველმოქმედო ფონდი "ნატვრის ხე" ეხმარება ჯანმრთელობის პრობლემების მქონე ბავშვებს, რომლებსაც საზღვარგარეთ მკურნალობა ესაჭიროებათ.
ნინო სურგულაძემ გასული რვა საქველმოქმედო კონცერტით, საზოგადოების და მსოფლიო ვარსკვლავების ჩართულობით, ოთხმოცამდე ბავშვს აჩუქა სიცოცხლე – ბავშვების უმრავლესობას საზღვარგარეთ მკურნალობა დაუფინანსდა და ჩაუტარდა ურთულესი ოპერაციები. ამას გარდა, "ნატვრის ხის" ფონდმა დახმარება გაუწია სოციალურად დაუცველ ათასამდე ოჯახს.