თბილისი, 2 აპრილი – Sputnik. ოდესიდან ბათუმისკენ გამოვიდა ბორანი, რომლის ბორტზე საქართველოს 44 მოქალაქე იმყოფება, იუწყება საქართველოს საგარეო საქმეთა სამინისტრო.
კიევში საქართველოს საელჩომ და ოდესაში და დონეცკში გენერალურმა საკონსულოებმა მოქალაქეები პირველადი მოხმარების საგნებით უზრუნველყვეს და სამშობლოში დაბრუნებაში დაეხმარნენ. საქართველოს მთავრობა ქვეყნის მოქალაქეებს სამშობლოში ეტაპობრივად დაბრუნებაში ეხმარება.
ბოლო ათ დღეში ბორნით სამშობლოში დაახლოებით 200 მოქალაქე დაბრუნდა. მათ შესაბამისი თხოვნით მიმართეს საქართველოს საგარეო უწყებას, საელჩოსა და საკონსულოებს.
საქართველოს საგარეო უწყების ძალისხმევით კორონავირუსის პანდემიის გამოცხადების შემდეგ სამშობლოში დაბრუნება 4 ათასზე მეტმა მოქალაქემ შეძლო. მათ საკარანტინო ზონებში ათავსებენ, სადაც მედიკოსების დაკვირევბის ქვეშ 14 დღის განმავლობაში იმყოფებიან.
კიდევ ათასობით საქართველოს მოქალაქეს, რომლებიც მსოფლიოს 40 ქვეყანაში იმყოფებიან, საცხოვრებლითა და პირველადი მოხმარების საგნებით დაეხმარნენ.
