თბილისი, 21 მარტი - Sputnik. საქართველოს პრემიერ-მინისტრმა ისაუბრა იმ შეზღუდვებზე, რომლებიც საგანგებო მდგომარეობის დროს იმოქმედებს.
საქართველოში საგანგებო მდგომარეობა 1 თვით, 21 აპრილამდე გამოცხადდება, ამის შესახებ საქართველოს მთავრობამ დღეს მიმართა პრეზიდენტს.
საქართველოში საგანგებო მდგომარეობის გამოცხადებას პარლამენტის მხარდაჭერა სჭირდება. პარლამენტი საგანგებო სხდომას დღესვე გამართავს.
გიორგი გახარიას თქმით, შეზღუდვები მოიცავს შემდეგ სფეროებს:
- იზოლაციის ან კარანტინის წესების დარღვევისთვის პირი იძულებით იყოს გადაყვანილი შესაბამის დაწესებულებაში, წესების დარღვევისთვის გამოყენებული იქნება სანქციები.
- საერთაშორისო სამგზავრო სახმელეთო მიმოსვლაზე წესდება შეზღუდვები გარდა სატვირთო გადაზიდვებისა.
- დგინდება საჯარო სერვისების მიწოდების განსხვავებული სერვისები და ადმინისტრაციული საქმის წარმოების განსხვავებული წესები და ვადები.
- საქართველოს მთავრობას მიეცემა უფლება, აუცილებლობის შემთხვევაში, საკარანტინო საიზოლაციო სამედიცინო მიზნებისთვის შეზღუდოს საკუთრების უფლება და გამოიყენოს ფიზიკურ ან იურიდიულ პირთა ქონება და მატერიალური საშუალებები.
- იზღუდება 10 კაცზე მეტი ადამიანის თავშეყრა.
- მთავრობას ექნება უფლება, კერძო ორგანიზაციებს, ბიზნესსტრუქტურებს შეუზღუდოს ან დაავალოს კონკრეტული საქმიანობის განხორციელება.
- აუცილებლობის შემთხვევაში მთავრობა უზრუნველყოფს მედიკამენტებზე, სამედიცინო მომსახურებასა და პირველადი მოხმარების პროდუქტებზე ფასების რეგულირებას.
- მთავრობა დაადგენს განათლების შესახებ საქართველოს კანონით დადგენილი წესებისგან განსხვავებულ წესებს და პირობებს.
- საჭიროების შემთხვევაში მთავრობა შეძლებს, მოახდინოს შესაბამისი სამედიცინო განათლებისა და უფლებამოსილების მქონე პირთა საყოველთაო მობილიზება.
- საქართველოს სასამართლოს სხდომები შესაძლებელია, გაიმართოს დისტანციურად.
მთავრობის მეთაურის განმარტებით, ყველა ფიზიკური და იურიდიული პირი ვალდებულია, დაიცვას საგანგებო მდგომარეობის რეჟიმი.
გახარიას თქმით, საგანგებო მდგომარეობა არ შეეხება მედიას.
