თბილისი, 6 მარტი — Sputnik. ტელეწამყვანი და მოდელი ეკო ფანგანი სოციალურ ქსელში საქართველოში კორონავირუსის გავრცელების შესახებ წერს. ტელეწამყვანი კატეგორიულია და ამბობს, რომ სისხლის სამართლის საქმე უნდა აღიძრას იმ ადამიანებზე, ვინც იტალიაში იყო ბოლო 20 დღის განმავლობაში და კარანტინში არ წავიდა.
„აკრძალვის მიუხედავად, იტალიაში მაინც მიემგზავრებიან, ბევრი იტალიიდან ჩამოსული კარანტიზე საერთოდ უარს ამბობს, ზოგიერთი ვითომ სახლშია და სინამდვილეში მაღაზიებში დასეირნობს და ზოგიერთი კი, სიცხიანი თვითმფრინავში დამწევს სვამს (ნუ ეს გასაგებია), მაგრამ საზღვარზეც არ ამბობს, რომ სიცხე ჰქონდა და მალავს! წყევლეთ ახლა ჩინელები. არანაირი მოქალაქობრივი პასუხისმგებლობა არ გააჩნია ძალიან ბევრ ქართველს“, – წერს ტელეწამყვანი.
ბოლო მონაცემებით, საქართველოში კორონავირუსით ინფიცირებულთა რაოდენობა ცხრამდე გაიზარდა, კარანტინში 150-ზე მეტი ადამიანია.
დაავადებათა კონტროლის ცენტრის ხელმძღვანელის ამირან გამყრელიძის თქმით, ბოლოს გამოვლენილი ხუთი ინფიცირებული მგზავრობდა 44 წლის საქართველოს მოქალაქესთან ერთად, რომელიც იტალიიდან კვირას ჩამოფრინდა და რომელსაც კორონავირუსი დაუდგინდა.
ყველა ინფიცირებულის მდგომარეობა კლინიკურად დამაკმაყოფილებელია და მხოლოდ ერთი პაციენტის მდგომარეობაა უფრო მეტად საყურადღებო.
ახალი კორონავირუსის გავრცელების პრევენციის მიზნით უწყებათშორისმა საკოორდინაციო საბჭომ გასცა რეკომენდაცია საზოგადოებრივი თავშეყრის ადგილებში ხალხმრავალი ღონისძიებების გაუქმების შესახებ.
სკოლებში, საბავშვო ბაღებსა და უმაღლეს სასწავლებლებში ორკვირიანი არდადეგები გამოცხადდა. უმაღლესი სასწავლო დაწესებულებების ნაწილი დისტანციური ელექტრონული სწავლების მეთოდზე გადადის.
კორონავირუსის გავრცელების პრევენციის მიზნით საკარანტინო სივრცეები მოწყობილია გონიოში, აბასთუმანში, თბილისის კლინიკა „ვივამედში“, საჩხერეში, ცენტრალურ რესპუბლიკურ საავადმყოფოში, ტუბერკულიოზის ცენტრის ბავშვთა განყოფილებაში, გორის ჰოსპიტალში.
ინფიცირების საერთო რაოდენობა მსოფლიოს მასშტაბით ამ დროისათვის 98 704 კაცს შეადგენს. აქედან 80 556 მატერიკულ ჩინეთზე მოდის, 6 593 — სამხრეთ კორეაზე, 3 858 იტალიაზე, 3 513 — ირანზე, ხოლო დანარჩენი შემთხვევები სხვადასხვა ქვეყნებშია გამოვლენილი. სულ გარდაიცვალა 3 383 კაცი, გამოჯანმრთელდა და საავადმყოფოებიდან გაეწერა 55 497 პაციენტი.
