თბილისი, 17 თებერვალი — Sputnik. 16 თებერვალს გუდაურში 28 წლის ბიჭი მოკლეს. მოკლული თაზო გორთამაშვილია, რომელიც სამთო კურორტის ერთ-ერთ ბარში ბარმენად მუშაობდა.
გამოძიების ინფორმაციით, დაპირისპირება ურთიერთშელაპარაკების ნიადაგზე მოხდა. 28 წლის გორთამაშვილსა და მის 26 წლის მეგობარს 39 წლის მამაკაცმა ცეცხლსასროლი იარაღით მიაყენა ჭრილობები და მიიმალა. გორთამაშვილი ადგილზე გარდაიცვალა, მეორე დაჭრილი კი გადაყვანილია საავადმყოფოში. არსებული ინფორმაციით, მკვლელობაში ბრალდებული ადგილობრივი მცხოვრებია.
View this post on Instagram
გუდაურში თაზო გორთამაშვილს ბევრი იცნობდა. ის აქტიური სპორტული ცხოვრებით ცხოვრობდა და სნოუბორდზე სრიალსაც ასწავლიდა კურორტზე ჩასულ დამსვენებლებს.
რაც შეეხება მკვლელობაში ბრალდებულს, 39 წლის მამაკაცი პოლიციამ უკვე დააკავა. შსს-ს ინფორმაციით, მცხეთა-მთიანეთის პოლიციის დეპარტამენტის თანამშრომლებმა 1981 წელს დაბადებული მ.კ. განზრახ მკვლელობისა (108 მუხლი) და დამამძიმებელ გარემოებაში განზრახ მკვლელობის მცდელობის (19-109 მუხლი) ბრალდებით ცხელ კვალზე გუდაურშივე დააკავეს. მას 16-დან 20 წლამდე ან უვადო თავისუფლების აღკვეთა ემუქრება.