თბილისი, 30 იანვარი — Sputnik. ქვიშხეთში ავარიისას დაშავებული ქალის, დაღუპული ბავშვების დედის მარიანა ქორიძის მეგობარი სოციალურ ქსელში მისი ჯანმრთელობის მდგომარეობასთან დაკავშირებით წერს. მისი თქმით, მარიანას გამოჯანმრთელებას მისი ოჯახის ცოცხლად დარჩენილი წევრები ელოდებიან და ძალიან სტკივა გული, როდესაც სოციალურ ქსელში სხვადასხვა მოსაზრებას კითხულობს ამასთან დაკავშირებით.
„მესმის განიცდით, მაგრამ თავი შეიკავეთ ისეთი კომენტარებისგან „რად უნდა სიცოცხლე“, „რად უნდა გადარჩენა“. მესმის, არც თვითონ მოუნდებოდა. მეც ბევრჯერ წამომცდა მსგავსი სიტყვები, რადგან ჯოჯოხეთი ხვდება აქ და მებრალება. ვიცი თქვენც ამიტომ წერთ, არ გიბრაზდებით, მაგრამ მარის ჰყავს გაუბედურებული დედა და მამა, და, რომელიც ელოდება. ბაქარის დედა, რომელსაც მხოლოდ მარიანა დარჩა იმედად და ებღაუჭება მის სიცოცხლეს“, – წერს ქალი და საზოგადოებას სთხოვს, მისთვის ილოცონ.
26 იანვარს ქვიშხეთში მომხდარი ავარიის დროს ახალგაზრდა მამაკაცი და მისი სამი მცირეწლოვანი ბავშვი დაიღუპნენ. გარდაცვლილები არიან 33 წლის ბაქარ ბანძელაძე და მისი სამი შვილი – ორი ბიჭი და ერთი გოგონა. ბანძელაძის მეუღლე, ბავშვების დედა მძიმე მდგომარეობაში საავადმყოფოში მართვით სუნთქვაზეა და რეანიმაციაში იმყოფება.
ბანძელაძეების ოჯახი ქუთაისიდანაა. ბაქარ ბანძელაძე წლების მანძილზე საზღვარგარეთ მუშაობდა და საქართველოში ცოტა ხნის წინ დაბრუნდა. იმ დღეს ქალიშვილის დაბადების დღე იყო, რომელიც ბაკურიანში აღნიშნეს. საზარელი ავარია სწორედ იმ დროს მოხდა, როდესაც ბანძელაძეები იქიდან ბრუნდებოდნენ. შსს-ს ცნობით, მომხდარზე გამოძიება სისხლის სამართლის კოდექსის 276-ე მუხლის მე-8 ნაწილით დაიწყო, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს, რამაც ორი ან მეტი ადამიანის სიცოცხლის მოსპობა გამოიწვია.