მსახიობმა ლალი ბადურაშვილმა გადაცემა „სხვა რაკურსში“ საკუთარ ტრაგედიაზე ისაუბრა და ის დღე გაიხსენა, როდესაც შვილის ერეკლე ბადურაშვილის გარდაცვალების შესახებ შეიტყო.
„ერეკლეს გარდაცვალების დროს გავითიშე. დასაფლავებიდან რეანიმაციაში წამიყვანეს. ერთი კვირა ჰქონდა ფილმის დასასრულებლად დარჩენილი. ქართულ-თურქული ფილმია, შემდეგ პროდიუსერმა და ჯგუფმა დაასრულა ეს ფილმი“, – ამბობს ლალი ბადურაშვილი.
მისი თქმით, ცნობილ რეჟისორს ორმხრივი ფილტვების ანთება დაემართა და წინა დღეს რომ წასულიყო საავადმყოფოში, გადარჩებოდა. „მტერი რომ არის, იმასაც კი არ ვუსურვებ, ეს ისეთი რამეა“, – ამბობს მსახიობი.
რეჟისორი ერეკლე ბადურაშვილი 57 წლის ასაკში, 2019 წლის მარტში გარდაიცვალა. ერეკლე ბადურაშვილმა 1983 წელს დაამთავრა თბილისის შოთა რუსთაველის სახელობის თეატრალური ინსტიტუტის სარეჟისორო ფაკულტეტი. მისი რეჟისორობით გადაღებულია ფილმები „ავტოპორტრეტი“ (1987), „ცოდვის დღესასწაული“ (1990), „თბილისი ჩემი სახლია“ (1994), „კიდევ ერთი ქართული ისტორია“ (2003); სცენარის ავტორია ფილმებისა „ავტოპორტრეტი“, „ცოდვის დღესასწაული“.
ერეკლე ბადურაშვილი ცნობილი მსახიობის ლალი ბადურაშვილის ვაჟი და მომღერალ ნინი ბადურაშვილის მამა იყო. 2017 წელს ბადურაშვილმა დაიწყო ახალი ფილმის – „ხიდის“ გადაღება, რომელიც პირველი ქართულ-თურქული მხატვრული ფილმია. გადაღებები ბათუმში, თბილისსა და სტამბულში მიმდინარეობდა. ფილმში მთავარ როლს ნინი ბადურაშვილი ასრულებს.
